Ilaz Duli rrëfen momentet e vështira që përjetoi gjatë sulmit terrorist në Kabul, prej të cilit arriti të mbijetonte. Duli dhe miku i tij nga Bangladeshi kishin dalë te hyrja e hotelit natën e 20 janarit të vitit 2018.
Sakaq, pas përshëndetjes me mikun dhe pak para shpërthimit, shqiptari komunikoi në telefon me familjarët e tij që gjendeshin në Kosovë, ku i njoftonte se kur të mbaronte punë, do kthehej në shtëpi, shkruan “Koha Ditore”.
“Kam biseduar me familjen katër-pesë minuta dhe ka qenë ora tetë e tridhjetë apo tridhjetepesë kur e kam ndërprerë”, thekson Duli, duke kujtuar pastaj fjalët e fundit që ua kishte thënë anëtarëve të familjes. “Sot është e shtunë, të premten e javës së ardhshme vij në Kosovë, do të thotë pas gjashtë ditësh mbërrij dhe dikush del e më merr si zakonisht në aeroport”.
Ndësa shqiptari fliste me familjen në Prishtinë, 6 militantë talebanë kishin kaluar murin e lartë prej 4 metrash të hotelit “Interkontinental” në Kabul dhe kishin mbërritur para dy gardianëve të armatosur të hyrjes.
“Por në momentin që e kam kryer bisedën dhe e kam vendosur telefonin në xhep, hapin e parë që e kam bërë për të shkuar te ashensori, i pari prej gjashtë talebanëve ka hedhur veten në erë për ta thyer kordonin dhe ka vrarë dy gardianët”.
Përnjëherë fuqia e shpërthimit do t’ia kujtonte Dulit bombardimet e NATO-s kundër caqeve ushtarake serbe në luftën e Kosovës.
“Eksplozivi ka qenë aq i fortë, sikurse NATO-ja kur ka bombarduar. Nuk e kam pasur larg as dhjetë metra”, tregon ai.
