Gjykata e Krimeve të Rënda dënon me burgim të përjetshëm Ferdinand Rukon i cili vrau gruan e tij, Liljana Rukaj duke e hedhur nga dritarja.
Ruko përfiton ulje dënimi për shkak të gjykimit të shkurtuar, do vuajë 35 vite burg.
Ngjarja ka ndodhur në 3 dhjetor 2016 në lagjen “Kryengritja të Fierit”, në qyetin e Fierit.
52-vjeçari pas një debati e kishte zhveshur viktimën dhe e kishte futur në banjo, ku dhe kishte ushtruar dhunë makabre.
Më pas e ka shtyrë nga dritarja e katit të katërt të apartamentit. 42-vjeçarja, nënë e 2 fëmijëve ka gjetur vdekjen pak minuta pasi është nisur drejt spitalit rajonal të Fierit.
Ferdinand Ruko ka pranuar krimin e rëndë në polici.
Një muaj para se të gjente vdekjen tragjike nga bashkëshorti i saj Liljana Rukaj ishte dhunuar sërish.
Më 4 nëntor kishte qenë rasti i fundit i dhunës për të cilën ajo kishte kërkuar ndihmë. Gjykata e Fierit kishte dhënë urdhër mbrojtje për 42- vjeçaren, kujdestarinë e 2 fëmijëve si edhe shtëpinë, ndërsa bashkëshorti i saj duhet të ruante distancë 2 metër largësi dhe të paguante pension për dy fëmijët.
Por, ky vendim nuk iu përcoll as policisë, as përmbarimit dhe as Shërbimit Social. Mosekzekutimi i urdhrit të mbrojtjes solli dhe ngjarjen tragjike që tronditi mbarë opinionin.
