Në maj të vitit të kaluar u arrestua Hasan Martani, mësues matematike në shkollën 9-vjeçare të Kasharit, pasi akuzohej se kishte ngacmuar një nga nxënëset e tij të mitura.
Tashmë, gjykata ka dhënë dënimin për mësuesin që bëri bujë, ndërsa si provë në atë kohë shërbyen komunikimit në “Facebook” mes mësuesit të matematikës dhe nxënëses së mitur.
Martani kërkoi në sallën e gjyqit pafajësi, por ai u dënua me 3 vjet burg, nga të cilat ai do të kryejë 2, për shkak të gjykimit të shkurtuar. Sipas vendimit të Gjykatës, mësuesi Martani kishte që në janar 2017, që kishte nisur të ngacmonte vajzën e mitur.
Por, kjo e fundit kishte folur vetëm në maj, duke u treguar prindërve dhe më pas është bërë kallëzimi në Polici. Martani është proceduar në “arrest shtëpiak”, për shkak të problemeve me shëndetin.
Madje, mësuesi kishte njohje familjare me prindërit e vajzës së mitur, të cilët fillimisht kanë qenë skeptikë për denoncimin, por më pas janë bindur kur kanë komunikuar me të përmes llogarisë në “Facebook” të vajzës.
Kjo e fundit ka kaluar momente shumë të vështira gjatë gjithë kohës që ngacmohej nga mësuesi i saj kujdestar.
DËSHMIA E VAJZËS
Dëshmia e së miturës ka qenë përcaktuese në këtë proces. E marrë në pyetje në prani të psikologëve, vajza ka shpjeguar se ndihej e shqetësuar dhe e trembur nga veprimet e mësuesit që në janar të vitit 2017. Ajo ka shpjeguar se të pandehurin e ka pasur mësues kujdestar dhe se ai i shkruante shpesh në “Facebook”.
Vajza ka treguar se mësuesi fillimisht, i ka kërkuar një fotografi të sajën me pretendimin se do të bënte një shkrim për nxënësit e dalluar. Edhe pse vajza ia dërgoi foton përmes “Facebook”, shkrimi nuk u bë kurrë. Më tej, mësuesi Martani i dërgonte teste të matematikës së miturës, me qëllim për ta joshur. Kulmi ka arritur pas orëve të mësimit, kur mësuesi i ka kërkuar vajzës të qëndrojë në kabinetin e informatikës në shkollë dhe më pas, e ka puthur me forcë.
Më tej, ai ka shkruar në “Facebook” të miturës, duke i kërkuar që të fshinte SMS-të që këmbenin dhe të mos u tregonte prindërve. Mësuesi arriti deri aty sa ta shantazhonte vajzën e mitur që të mos tregonte për ngjarjet, duke i vënë nota të ulëta në mësim. E ndodhur në gjendje të rëndë, vajza e mitur vendosi që t’i tregojë nënës së saj për gjithçka që kishte ndodhur me më- suesin. Nëna ka marrë situatën në dorë, duke vazhduar komunikimet me mësuesin përmes llogarisë në “Facebook” të vajzës, duke grumbulluar më shumë prova dhe më pas, ka bërë kallëzimin në Polici, shkruan Panorama.
Në deklarimet e dhëna në fazën e hetimeve, Hasan Martani ka mbajtur qëndrim mohues ndaj akuzës, duke mospranuar asnjë deklarim të së miturës për veprime të natyrës seksuale. Të njëjtin qëndrim ai ka mbajtur edhe në Gjykatë, duke kërkuar vetëm pafajësi para trupit gjykues. I pandehuri ka deklaruar se vuante nga ishemia e zemrës dhe për këtë arsye, i rrezikohej jeta në paraburgim. Kjo u vërtetua edhe nga ekspertimi mjeko-ligjor. Megjithatë, në përfundim, ai u dënua me burg dhe dënimin e vuan në një burg të sigurisë së ulët.
