Histori që përsëritet, “Bletët” mund të jenë Leicesteri i ri në Angli

Të gjithë adhuruesit e futbollit e kujtojnë Leicesterin si një ndër historitë më të bukura të triumfit. Një ekip i “dobët” në krahasim me rivalët si nga emrat dhe nga buxheti arriti të shpallet kampion i Premier Leagues, duke mposhtur konkurrencën e “të mëdhenjve”. Por tashmë tifozët e Watfordit kanë filluar të besojnë se historia do të përsëritet dhe se është pikërisht skuadra e tyre surpriza e këtij sezoni.

Skuadra e drejtuar nga Javi Garcia ka bërë një start fantastik këtë sezon, pasi në katër ndeshjet e para ka arritur të marrë pikë të plota. “Bletët” do të përpiqen të qëndrojnë me këmbë në tokë, pasi kampionati është shumë i gjatë dhe akoma nuk janë përballur me skuadrat e mëdha, tifozët kanë filluar të ëndërrojnë, madje dhe të vendosin baste, pasi u besojnë disa statistikave që lidhen me Leicesterin kampion.

Por sezonin e kaluar Watford nuk e nisi ashtu siç duhet, dhe eventualisht e përfundoi kampionatin në vend të 14-të. Gjithsesi, mesa duket qenka një ogur i mirë për Watford, pasi Leicester gjithashtu e përfundoi sezonin në vend të 14-të në sezonin 2014/15 përpara se të befasonte të gjithë botën e futbollit një sezon më pas me titullin kampion.

Ajo që është më e çuditshme është se të besuarit e Garcia-s e përfunduan sezonin me 41 pikë nga 11 fitore, tetë barazime dhe 19 humbje – shifra ekzakte me ato të Leicester në sezonin përpara se të fitonte titullin.