Ministrja e Infrastrukturës dhe Energjisë, Belinda Balluku, pas mbledhjes së qeverisë, ka njoftuar se biletat në transportin ndërqytetas do të zëvendësohen me bileta elektronike. Prerja e biletave do të bëhet përmes sistemeve elektronike të fiskalizuara.
“Ky pr/ligj sjell disa risi, hiqen biletat në format të parashtypura në transportin ndërqytetës. Prerja e biletave do të bëhet përmes sistemit elektronik e-transport të fiskalizuara.
Prerja e biletave bëhet nga agjencitë në mjete, autobus apo kudo tjetër. Ndërkohë platforma elektronike garanton ciklin e plotë të prerjes së biletave.
Shtohen elementët e faturës së fiskalizuar. Biletat në format letër do të gjenerohen nga platforma elektronike”, u shpreh ministrja.
Projetkvendimi i dytë për transportin urban, tha ministrja, ka të bëjë me kompensimin, si pjesë e paketës anti-krizë.
Qeveria ka hartuar një projektligj që do të kompensojë të gjithë shoqëritë e transportit urban ndërqytetas për të përballur çmimin e rritur të naftës, me synimin që të mos ketë rritje të çmimit të biletës për udhëtarët.
“Çmimi i naftës ka një rritje të ndjeshme, qeveria ka vendosur që pjesë të Paketës së Rezitencës të bëjë edhe kompensimin me 100 lekë për litër. I kemi dhënë rrugë hapjes së mënyrës së kalkulimit për të gjitha njësitë që janë në këtë proces.
Do të shpenzohen gjatë muajit prill dhe maj. 98% e transportit në Shqipëri kryhet përmes rrugës dhe po mundohemi të ruajmë çmimin e biletës që mos të ketë një ndryshim. Po punojmë për përmirësimin e flotës apo për të pasur dhe një flokë të re”.
