Pas akuzave që kryeministri Rama hodhi paraditen e së dielës nga Vora, ku tha se hipotekat janë bërë pengesë për përmbylljen e procesit të marrjes së pronësisë, ka reaguar LSI-ja, përfaqësuesit e së cilës kanë drejtuar këtë institucion gjatë mandatit qeveritar që po përfundon.
Në sfidë të hapur ndaj fjalës së Kryeministrit, numri dy i LSI-së Luan Rama, gjatë një konference për shtyp, pasi hodhi poshtë akuzat si të pavërteta, la të kuptohej se pengesa nuk qëndron tek hipoteka, por tek fazat pararendëse të procesit, dhe nëse akuza e Kryeministrit qëndron ai tha: “Hipotekat i kanë njerëzit e Rilindjes të emëruar nga ai. Por meqë është kështu, unë i ftoj të 3 mijë familjet e bashkisë së Vorës të paraqiten nesër pranë Hipotekës së Tiranës, të marrin dokumentet e pronësisë meqë pjesën e tepsisë e ka zotëria në fjalë. Regjistruesi të bëjnë gati 3 mijë certifikatat e pronësisë për të dëshmuar të vërtetën se kush i mban ato peng”,- tha ai.
Luan Rama kujtoi kontributet e LSI-së në koalicion ku veçoi reformën në drejtësi. “Kryetari i Rilindjes ka të drejtë kur thotë që ne nuk e lejuam ta bënte siç e kishte konceptuat ai, që reforma në drejtësi të shërbente që pushteti i drejtësisë të bëhej aneksi i Rilindjes. Gjithë shqiptarët e dinë që reforma në drejtësi u bë dhe u miratua me 140 vota në parlament falë kontributit të LSI”, vuri në dukje ai.
LSI gjithashtu siguroi se raportet me PS-në i ka mbyllur përfundimisht. “Qytetarët do ndëshkojnë këtë klloun të mashtrimit dhe të hipokrizisë që po përdor një tufë banditësh për të manipuluar votat, ashtu siç bëri me thirrjen ndaj policisë” shtoi nënkryetari i LSI-së.
