Hije skandali për Botërorin e Rusisë, pasi në horizont kanë dalë deklarata që lidhen me përdorimin e dopingut. Nën shënjestër është mesfushori i kombëtares ruse, Denis Cheryshev, i cili gjatë verës ka kaluar te Valencia. Ndaj tij është hapur një hetim pasi ka marrë disa hormone për rritjen, që mesa duket ia kanë dhënë mjekët e kombëtares ruse para startit të Kupës së Botës.
Gjithcka e ka zbuluar babai i Cheryshev, i cili e tregoi këtë fakt në një intervistë për mediat. Por fillimisht ka qenë Federata Ruse e Futbollit që e ka përgënjeshtruar: “Fjalët e tij janë keq interpretuar. Bëhej fjalë vetëm për një “rich plazma” (PRP) që shërben për dhimbjet muskulore dhe të lejueshme nga WADA.”
“Telegraph” ka zbuluar se Cheryshev, autor i katër golave në pesë ndeshje në botërorin e zhvilluar në shtëpi, është marrë në pyetje nga anti-dopingu në Spanjë, duke qenë se luan në La Liga.
Futbollisti ka refuzuar me forcë hipotezën e dopingut, që paradoksalisht lind nga deklarata e bërë nga i ati i tij Dimtri Cheryshev për gazetën ruse “Sport Weekend”, ku pohoi se djali i tij ka marrë hormone për rritjen, gjatë grumbullimit para botërorit.
Federata Ruse e Futbollit ka mohuar gjithçka, por nëse përdorimi i dopingut vërtetohet, atëherë Cheryshev rrezikon deri në katër vite heqje lirie.
