Kina mund të ndërmarrë sanksione ndaj zyrtarëve amerikanë, si një formë hakmarrjeje ndaj padive të ngritura kundër Pekinit, lidhur me koronavirusin.
Global Times raporton se janë identifikuar të paktën 4 ligjvënës amerikanë dhe dy subjekte amerikane që do të futeshin në listën e sanksioneve të Kinës.
“Kina është jashtëzakonisht e shqetësuar me abuzimin e procesit gjyqësor nga SHBA kundër Kinës lidhur me epideminë e COVID-19 dhe përgatit masa ndëshkuese kundër individëve, subjekteve dhe zyrtarëve shtetërorë të SHBA-së të cilët ngritën padi kundër Kinës duke kërkuar dëmshpërblim për pandeminë e koronavirusit”, thuhet në raportin e të përditshmes me qendër në Pekin, duke cituar “burime të afërta me çështjen”.
Missouri në SHBA ishte vendi i parë që paditi Pekinin në gjykatat federale amerikane.
Sipas raportit, prokurori i Përgjithshëm i Missouri-t, Eric Schmitt mund të jetë një nga zyrtarët amerikanë që mund të përballet me sanksione.
Ndaj Kinës janë ngritur gjithsej deri më tani gjashtë padi nga pala amerikane.
