Nga grabitja e miliona eurove në Rinas disa ditë më parë nuk ka ende asnjë gjurmë nga autorët e ngjarjes. Prokuroria vijon hetimet për zbardhjen e ngjarjes dhe deri tani janë shpallur në kërkim të paktën pesë persona.
Hetimet janë shtrirë dhe në Kosovë, pasi ka dyshime se automjetet që u përdorën në grabitje të jenë futur nga Kosova. Ndërkaq, pas kontrollit në vilën e Admir Muratajt në Fushë-Prezë, policia zbuloi detaje të tjera mbi jetën e të ashtuquajturit ‘truri i grabitjeve’.
Në dhomën e ndenjes së vilës, efektivët mësohet se gjeten CD me filma të njohur për grabitjen e bankave. Ndërsa mes tyre ishte edhe më i famshmi “Point break”.
Gjithashtu Prokuroria e Krimeve të Rënda ka kërkuar të administrojë hyrje-daljet e familjarëve të Admir Murataj në Kosovë, pasi dyshohet se gjatë arratisë 47-vjeçari është fshehur atje.
Sipas të dhënave nga policia njëri prej grabitësve dyshohet të jetë një ish-komando. Një gjë e tillë është vërejtur nga lëvizjet e këtij të fundit, mjaft profesioniste.
