Drejtori i Teatrit Kombëtar, Hervin Çuli, në një lidhje me “Skype” për News24, konfirmoi se kanë nisur përgatitjet për nisjen e sezonit të ri, ndërsa pritet urdhri nga qeveria dhe Ministria e Kulturës për hapjen e institucioneve në ambientet e brendshme.
Duke folur për pasojat e koronavirusit, ai ngriti një tjetër shqetësim madhor, atë të realizimit të shumë festivaleve dhe marrjes së çmimeve pa meritë. Ai tha se në Shqipëri ka më shumë festivale se produksione. Si dhe ka më shumë çmime se aktorë apo regjisorë.
“Festivali në Korçë që pashë, publiku e ndoqi në mënyrë të jashtëzakonshme. Humbje kemi pasur edhe ne, ka një gërryerje, bjerrje, por institucionet publike këtu te ne nuk pyesin për humbje.
Këtu për dreq ka shumë festivale, ka më shumë festivale se produksione, ka më shumë çmime se aktorë apo regjisorë.
Nuk kanë as një shfaqje të denjë dhe bëjnë festivale. Aktualisht janë zhvilluar tre festivale paralel, në fund të muajit shtator. Pra, brenda një muaji janë zhvilluar katër festivale. Problemi është se këto nuk janë festa, por kompeticione, që herë pas here krijojnë një realitet të gënjeshtërt.
Le t’i lënë te festat dhe unë do të isha dakord. Por, kur i kthen në kompeticion me ndarje çmimesh, ku sot është e rrallë në Shqipëri të gjesh një aktor pa një çmim. Këtu bëhen “alla Oscar”. Është kthyer në qesharake, janë si çmimet e presidentit. Nuk ka ngelur njeri pa marrë çmim edhe nga presidenti dhe bie pastaj vlera”, shtoi ai.
