Janar-qershor, 80 mijë vizitorë në kalanë e Shkodrës

Kalaja e Shkodrës gjatë periudhës janar-qershor 2025 është vizituar nga rreth 80 mijë vizitorë. Drejtoria Rajonale e Trashëgimisë Kulturore Shkodër shprehet se ky numër vizitorësh është një dëshmi për historinë dhe trashëgiminë. “Kalaja e Shkodrës – simbol i qytetit dhe krenari e trashëgimisë sonë kulturore -është vizituar nga rreth 80,000 vizitorë gjatë periudhës janar-qershor 2025! Kjo përfaqëson një rritje domethënëse krahasuar me të njëjtën periudhë të vitit të kaluar, duke e bërë Parkun Arkeologjik Shkodër një nga më të vizituarit në rang kombëtar. Ky nuk është thjesht një numër, por një dëshmi e dashurisë për historinë dhe trashëgiminë!
Një ftesë për të gjithë ju që ende nuk e keni vizituar kalanë. Ejani të përjetoni historinë nga afër, të shijoni një pamje 360° që të lë pa fjalë dhe të prekni gjurmët e shekujve me duart tuaja. Kalaja e Shkodrës – aty ku historia jeton!”, shprehet DRTK Shkodër. Kalaja e Shkodrës ose Rozafa është një monument mijëvjeçar i ngritur në një kodër shkëmbore në hyrje të qytetit të Shkodrës, në jug-lindje të tij. Qëndron mbi një kodër shkëmbore 130 metra mbi nivelin e detit, e rrethuar nga lumi Buna e Drin, me një sipërfaqe prej gati 9 hektarësh. Kalaja përbën një simbol të qytetit, e pranishme ndër piktura, gdhendje etj. Hyrjen kryesore kalaja e ka nga jug-lindja, sipërfaqja e brendshme ndahet nga muret e tre oborreve, me porta mes tyre. Oborret vijnë duke u ngritur njëri pas tjetrit, i treti është në pjesën e lartë të kodrës.