Ish-deputetja e Partisë Demokratike, Dhurata Çupi shkruan se situata shëndetësore e banorëve të Bulqizës vijon e përkeqësohet, teksa shprehet se është rritur numri i të prekurve nga helmimi i ujit.
Përmes një postimi në faqen e saj të “Facebook”, Çupi thekson se duhet të hetohet më gjerë lidhur me rastin e rëndë ku rrezikohet jeta e banorëve.
“Situata shëndetësore e banorëve të Bulqizës vijon të përkeqësohet dhe numri i të prekurve nga helmimi vjen në rritje. Autoritetet përgjegjëse po mundohen kujt t’ia lënë përgjegjësinë në derë për këtë ngjarje të rëndë.
Banorët e Bulqizës prej tre ditësh po përballen me një situatë të pazakontë duke shkuar drejt 100 numri i të prekurve nga helmimi.
Mjekët thonë se kjo po ndodh për shkak të cilësisë së ujit të pijshëm, ndërkohe qe ujësjellësi pret përgjigje analizash.
Nga ana tjetër qytetarët kanë tejmbushur spitalin duke shfaqur shenja helmimi.
Banorët e Bulqizës nuk mund të presin lojën kukafshehthi të autoriteteve por duhet të informohen e tu thuhet se çfarë po ndodh me ta dhe nga ju rrezikohet shëndeti i tyre.
I bëj thirrje autoriteteve ligjzbatuese, prokurorisë, të nisin sa më parë hetimin për këtë ngjarje që po rrezikon shëndetin e dhjetëra banorëve. Përgjegjësit e kësaj ngjarje duhet të vihen përpara drejtësisë.
Uroj shërim të shpejtë banorëve dhe shpresoj që ky masivizim i helmimit të popullatës të ndalet”, shkruan Çupi.
Kujtojmë se dhjetëra banorë të Bulqizës, fëmijë dhe të rritur, janë paraqitur në spitalin e qytetit me simptoma të helmimit prej të premtes në mbrëmje.
