Ministrja e Arsimit, Besa Shahini është shprehur se godina e gjimnazit “Janaq Kilica” në Fier do të rikonstruktohet.
Përmes një postimi në Facebook, Shahini tha se nuk do të lejojë që ngjarja me nxënësit të manipulohet politikisht. Ajo shtoi se në këtë shkollë janë shtuar oficerët e sigurisë dhe prezenca e psikologut në shkollë.
Kujtojmë se ditën e djeshme 60 persona (58 nxënës dhe 2 mësues) nga kjo shkollë u paraqitën në spital me shenja helmimi. Shkak për këtë u bë spraji i hedhur nga dy nxënës të shkollës. Ky ishte rasti i dytë i ngjashëm në 10 ditët e fundit, që shënohej në këtë gjimnaz.
Postimi i plotë:
Sapo u dakordësuam me Kryetarin e Bashkisë Fier për të ndërhyrë edhe në godinën e vjetër të shkollës së mesme “Janaq Kilica”, që ta sjellim në gjendjen e godinës së re, pra në gjendjen të cilën meriton shkolla qendrore e Fierit.
Nuk do të lejojmë që ngjarje të manipuluara politikisht për të shkaktuar kaos të dëmtojnë punën e mirë që bëhet në atë shkollë prej shumë e shumë vitesh. Kemi shtuar oficerët e sigurisë dhe prezencën e psikologut në shkollë, në mënyrë që të mbështesim drejtoren e cila po bën një punë të mirë në organizimin e shkollës.
Ankesat për ndërhyrje politike në shkollë po i hulumtojmë me kujdes dhe do të marrim masa që të sigurohemi se tensionet politike të stisura nga opozita jashtë-parlamentare mos të ndikojnë punën e rëndësishme shkollore.
