Ish-drejtuesi i lartë i Policisë, Mit’hat Havari ka deklaruar se nëse sekretari organizativ i Partisë Demokratike, Sahit Dollapi nuk do ishte larguar, sipas tij, opozita do kishte fituar politikisht.
Havari tha se nuk vuri re asnjë veprim anti-ligjor ndaj Dollapit, ndërsa shtoi se ai nuk duhej të kishte ikur, pasi, sipas tij një burrë shteti, i pjekur nuk do lëvizte nga vendi.
“Jo se i marr në mbrojtje strukturat po gjithsesi i di mirë këto vështirësi dhe halle. Para rrëzimit ai krijoi një incident. Aty ka munguar një oficer karriere, i kulturuar, i zgjuar që duke e njohur ti thoshte “zoti Sahit të lutem mos na pengoni në punën tonë” dhe ai do kishte ikur.
Kur erdhi FNSH, një grup policësh, ai u tremb dhe mori vrapin edhe u rrëzua. Një burrë shteti, i pjekur nuk lëviz nga vendi. Qëndron në vend dhe aty do fitonte politikisht opozita, nëse policia do tregohet aq e papërgjegjshme ta prekte me dorë duke mos bërë asgjë. Sepse deri në atë moment Dollapi nuk bëri asgjë, thjeshtë hoqi maskën, nuk pash veprim anti-ligjor. Por duke vrapuar ju e dini atë shprehjen… Penalizoi veten”, tha Havari.
