Greqia është pika ku takohen tre kontinente dhe është porta mes Lindjes dhe Perëndimit. Pozita e saj gjeografike e bën rrugën kryesore të tregtisë botërore të drogës, të tregut më fitimprurës kriminal ndërkombëtar që prodhon gjysmën e të ardhurave të krimit të organizuar në gjithë botën.
Kreu i Departamentit të Prokurorisë së Policisë së Atikës, Kostas Panagiotopulos, në një raport të publikuar të dielën, foli për Agjencinë mediatike Athinë-Maqedoni rreth rolit që Greqia luan në tregtinë ndërkombëtare të drogës dhe rrugët e transportimit të saj nga vendet ku prodhohet deri në Evropë.
“Greqia prodhon sasi të vogla kanabisi dhe është destinacioni i drogës që vjen nga jashtë për konsum të brendshëm, por edhe për transportimin drejt BE-së, kryesisht nga Shqipëria. Pozicioni i Greqisë në udhëkryqin e tre kontinenteve, bashkë me afërsinë me vendet që prodhojnë dhe trafikojnë drogë, e bën automatikisht një nga rrugët kryesore për transportimin e heroinës, si përmes kufijve tokësorë ashtu edhe nëpërmjet kufijve detarë”, tha ai.
Greqia është një nga vendet kryesore të tranzitit të heroinës së dërguar në Evropë, sikurse edhe destinacion për konsum të brendshëm. Shumë grekë janë të përfshirë në trafikun e heroinës në vend, ndjekur nga shqiptarët.
Në Greqi shpesh janë konfiskuar sasi të mëdha heroine, si për shembull një frigorifer-kamion që po transportonte 369 kilogramë drogë drejt Belgjikës, apo 20 kilogramë drogë të fshehur në një autobus turistik që vinte nga Turqia.
Shqipëria është një “pikë grumbullimi” për heroinën që transportohet më pas nga grupet kriminale shqiptare në destinacione të ndryshme, përfshirë këtu edhe Greqinë. Megjithatë, në përgatitjen dhe “prerjen” e heroinës, përfshihen edhe shumë shtetas grekë. Edhe afganët dhe pakistanezët janë të përfshirë në trafikimin e heroinës, ndërsa prodhimi dhe konsumimi janë rritur ndjeshëm në Afrikë.
Për të kontrabanduar drogën përtej kufijve përdoren një shumëllojshmëri metodash dhe mënyrash të ndryshme transporti, duke lëvizur sasi të mëdha droge nga vendet ku prodhohet (Afganistani, Taxhikistani dhe Pakistani) përmes Turqisë dhe më pas duke ndjekur tre rrugë alternative për të hyrë në Evropë. Italia është destinacioni më jugor, përmes Greqisë apo Ballkanit qoftë.
Kur vjen puna te kokaina, pikat hyrëse të drogës në Evropë janë portet e Atlantikut, Belgjikës, Holandës, Spanjës dhe Portugalisë, ku Greqia dhe Italia luajnë rol dytësor. Grekët kanë rol të kufizuar në tregtinë e kokainës, ndërkohë që përfshirja e shqiptarëve po rritet vazhdimisht në këtë fushë. Shqipëria është bërë një pikë kryesore e shpërndarjes së kokainës së destinuar për tregjet evropiane dhe përdoret si një vend ruajtës, ndonëse grekët ende mbizotërojnë tregun e tyre të kokainës.
Grupet kriminale bashkëpunojnë me homologët në Amerikën Latine dhe Karaibe dhe krijojnë “fronte” për të lehtësuar transportin e drogës dhe për të legalizuar të ardhurat. Për të sjellë kokainë në Greqi përdoret një shumëllojshmëri mënyrash të transportit.
“Marramendëse është shumëllojshmëria e automjeteve dhe metodave që përdoren për të importuar kanabis në Greqi”, tha Panagiotopulos, nga makinat dhe kamionët privatë te skafet dhe pakot postare. Grupet kriminale të përfshira në tregtinë e kanabisit janë kryesisht grekë, më pas vijnë shqiptarët.
Shumica e kanabisit të importuar nga jashtë Evropës vjen nga Afrika e Veriut dhe Libani, kryesisht në anije mallrash dhe anije peshkimi, ku “pika shpërndarëse e parë” zakonisht janë vendet e Mesdheut, ndërsa shumica e kanabisit të prodhuar në Evropë vjen nga Shqipëria, përmes Greqisë dhe kufijve veriorë të Italisë.
Përshtati Tirana Today
