Kryeministri i Kosovës, Ramush Haradinaj ka zhvilluar një takim me shoqërinë civile, të cilës i kërkoi që të qëndronte e pavarur.
Gjatë këtij takimi, Haradinaj ka folur edhe për rëndësinë e zbatimit të marrëveshjes së MSA-së, teksa bëri lidhjen e saj me demarkacionin.
Kryeministri tha se nëse të gjithë i kryejnë detyrat e veta, Kosova mund të shënojë një përparim të shpejtë, ose një zbatim të shpejtë të MSA-së e më pas të bëhet kandidate për Bashkimin Evropian.
“Nëse të gjithë ne i kryejmë detyrat e shtëpisë, kam besim të madh që Kosova mund të shënojë një përparim të shpejtë, ose një zbatim të shpejtë të MSA-së. Mundemi të kalojmë në status të kandidatit. Njëkohësisht zbatimi i MSA-së është vetvetiu materia që sjell liberalizimin e vizave.
Ne e dimë që është i lidhur liberalizimi dhe me shënjimin e kufirit me Malin e Zi. Mirëpo, për ketë temë do të përdorim standarde që krejt bota i ka. Një marrëveshje që nuk e kanë ratifiku dy Parlamente nuk është marrëveshje e përmbyllur, mbetet projekt marrëveshje. Procedurat e gjetjes së fakteve që i nxjerr komisioni ynë shtetëror prapë është procedurë, standard kjo që e vërteton se si ka shkuar një proces paraprak.
Dhe pastaj ne nuk duhet të bëjmë ndonjë zbulim, ka procedura si trajtohen këto tema mes shteteve, qofshin dhe anëtare të NATO-s, qoftë të qoftë një aspirant për anëtarësim në BE siç është rasti ynë”, tha Haradinaj.
