Demarkacioni është një çështje që ende e shqetëson kryeministrin Haradinaj, teksa ky i fundit ka thënë se Kuvendi duhet të marrë sa më shpejt vendimin për këtë temë.
“Nuk ka arsye për t’u vonuar në këtë temë. Aktualisht çfarë dimë është se Kuvendi nuk ka votë për këtë marrëveshje. Deputetët janë të lirë të vendosin në bazë të bindjeve të tyre. Nëse këtë marrëveshje e rrëzon Kuvendi, atëherë një derë mbyllet dhe një tjetër hapet. Do të gjendet një zgjidhje’’, ka thënë Kryeministri Haradinaj për Epokën e Re.
Më pas, Haradinaj theksoi se marrëveshja për Demarkacionin ka gabime, pasi sipas tij kufiri është zhvendosur nga Çakorri në Kuqishtë dhe nga Kulla në Savinovodë:
“Korrigjimi është i mundshëm, por ka shumë garanci që kur të ratifikohet, pastaj mund të ndodhë diçka. Ne nuk kemi ndonjë garanci që ta ratifikojmë kështu, pastaj ta korrigjojmë’’, ka shtuar ai.
Po ashtu, kryeministri i Kosovës pranoi se Demarkacioni është një çështje kyçe që hap dyert për liberalizimin:
“Jemi shumë të varur nga vendimi në Kuvend, prapë po e përsëris që sa më shpejt që Kuvendi merr vendim, përshpejtohet procesi. Kështu që, është mirë që sa më shpejt të thirret seance për këtë çështje dhe të mos vonohemi më shumë”.
