Kryeministri i Kosovës Ramush Haradinaj, ka udhëtuar në Shtetet e Bashkuara të Amerikës. Për këtë udhëtim i ka ardhur ftesë nga komuniteti Katolik Shqiptar, Shën Pali në Detroit. Udhëtimi i cili përkonte me pjesëmarrjen në shënimin e 108-vjetorit të Kryengritjes së Malësisë.
Haradinaj ka njoftuar se në këtë takim do të ketë edhe përfaqësues të komunitetit shqiptar katolik në Amerikë dhe autoritete të Detroitit. Gjithashtu gjatë kësaj vizite, mësohet se kryeministri Haradinaj do të takojë zyrtarë të tjerë të SHBA-së.
“Kryengritja e Malësisë ishte vazhdimësi e kryengritjeve anti-osmane në Kosovë, 1908-1910 dhe i parapriu ngritjes së flamurit në Vlorë nga Ismail – Qemal Vlora si dhe shpalljes së mëvetësisë së shtetit shqiptar më 1912”, raportohet nga njoftimi.
Kryeministri Haradinaj në nderim të kësaj date të veçantë dhe gjithë rrugëtimit historik të popullit shqiptar për liri dhe, në nderim të rolit dhe kontributit të ShBA-së po në këtë rrugëtim, do të zhvillojë takime me përfaqësues të shumtë të organizatave shqiptaro-amerikane dhe personalitete të tjera që kanë dhënë kontribut në këtë drejtim.
Të mos harrojmë se kryeministrit të Kosovës i ishte refuzuar viza në SHBA, e cila vetëm pak kohë më parë i është bërë i mundur lëshimi. Siç kishte konfirmuar edhe ai vetë refuzimi i vizës kishte shkaktuar anulimin e vizitave të tij në këtë shtet.
