Kryetari i AAK-së, Ramush Haradinaj ka lëshuar një deklaratë të fortë gjatë një interviste për “TV Dukagjini”, se Beogradi do të bombardohet nëse vetëm një ushtar serb hyn në Kosovë. Ai i ka mëshuar fort faktit se Vuçiç dhe Serbia nuk kanë guxim të ndërhyjnë në Kosovë, për shkak të garancisë ndërkombëtare.
“Nëse do të ndodhte kjo, e gjithë bota do ta dinte se Vuçiç po e bënë këtë për shërbim të Rusisë.
Nëse nuk po kanë mundësi se si me ia gjet zgjidhjen Rusisë, perëndimi është bukur i zoti me ia gjet zgjidhjen Serbisë, pasi këtë e kanë bërë edhe një herë në vitin 1999”, tha ai.
“E di që amerikanët nuk lejojnë asnjë ushtarë serb të shkel në territorin e Kosovës. E di që bombardohet Beogradi nëse ndodh diçka e tillë, sikurse në vitin 1999.
Këtë e di lidershipi i Serbisë mjaftë mirë. Po kaloi një oficer i Serbisë në territorin e Kosovës, do të bombardohet Beogradi. Beogradi, jo ndonjë territor tjetër”, tha Haradinaj.
Ish-kryeministri thotë se Vuçiç i di vijat e kuqe në raport me Kosovën. “Ne duhet të bëjmë punët tona. Por, Serbia e di se Kosova është zonë e përgjegjësisë së Amerikës, Britanisë e tjerëve”, deklaroi Haradinaj.
