“Në fund të vitit do të hiqen kufijtë mes Shqipërisë e Kosovës”, deklaroi kryeministri i Kosovës Ramush Haradinaj.
I ftuar në emisionin “Opinion” Haradinaj tha se kufiri mes dy vendeve me shqiptarë ka krijuar pengesa e shqetësime duke shprehur vullnetin për heqjen e tyre.
“Shpresoj që në ndërrimin e viteve të hiqet kufiri doganor. Kjo është një gjë që krijon shqetësime në kufi, pritje”, tha kryeministri i Kosovës.
Haradinaj foli edhe për çështjen e korrigjimit të kufijve me Serbinë, duke deklaruar edhe njëherë qëndrimin kundër. Sipas tij, deklaratat se Presheva e Bujanovci do t’i bashkohen Kosovës janë vetëm fjalë dhe qëllimi i vetëm është grabitja e veriut.
“Të gjitha këto që kanë ndodhur, nuk më lejojnë të mendoj se presidenti Thaçi e ka menduar si një projekt serioz. Unë mendoj se është një taktikë politike e tij.
Ne respektojmë vlerat e serbëve të Kosovës. Përkundër të kaluarës tonë tragjike. Ne nuk do shkojmë tek zgjidhja deri tek korrigjimet në territor. Ne nuk e hapin të kaluarën tonë. Nuk ka kthim pas, edhe vendet që nuk na njohin, vitin që vjen, këto vende do të na njohin. Ne do të luftojmë për tu bërë anëtarë të NATO-s. Kufiri nuk do ndryshojë. Ne nuk do të lejojmë të preken kufijtë tanë.
