Ramush Haradinaj është shprehur para medieve se ftesa nga Franca për t’u gjykuar, ishte një ftesë lufte nga shteti Serb. Ai gjithashtu tha se shqiptarët duhet t’i kuptojnë sulmet politike që bëjnë fqinjët, pasi kemi hequr mjaftueshëm keq nga lufta.
“Kush na respekton e respektojmë, kush na sulmon, jemi një brez që e kemi konfirmuar se ua kthejmë edhe sulmin. Fjalori im dallon prej këtyre përreth që janë në pushtet, dallon si prej opozitari. Ftesën për t’u gjykuar në Francë e kam marrë si luftë. Duhet ta kuptojnë se deri ku mund të tallesh me shqiptarët. Nëse s’e keni kuptuar, ju ftojmë ta kuptoni. Nuk kemi nevojë të shkojmë më keq. Kemi hequr boll prej lufte”- u shpreh Haradinaj.
Teksa u pyet se si po ndihet pas lirimit nga Gjykata e Francës, Haradinaj u shpreh se ndihet shumë i lumtur dhe se do mundohet për të rregulluar mënyrën e jetesës në Kosovë. Ai tha se shqiptarët meritojnë të jetojnë si të tjerët.
“Unë jam në Kosovë, jam i lumtur për mbështetjen dhe kam për të punuar sa më shumë me çdo njërin për të rregulluar jetesën në Kosovë. Detyra jonë është ta bëjmë jetën siç ka hije në vendin tonë. Shqiptarët nuk po kërkojnë më shumë sesa të jetojnë si të tjerët, nuk kërkojmë asgjë më shumë. Bota nuk është e përkryer. Komshinjtë i kemi shumë të këqij, atyre nuk u japim tokë, sepse nuk u takon”, – përfundoi Ramush Haradinaj
