Ramush Haradinaj, kreu i AAK-së dhe ish-kryeministri i Kosovës, ka folur pas seancës për shpërndarjen e Kuvendit. Ai e ka përshëndetur vendimin për shpërbërje. Mandej ka thënë se partia e tij është e gatshme të bëjë koalicion me Nismën e Fatmir Limajt si dhe AKR-në e Behgjet Pacollit.
Haradinaj e ka komentuar deklaratën e Albin Kurtit, i cili e quajti qeveri të dështuar qeverisjen Haradinaj. “Kjo është dëshmi e pjekurisë politike. Kësisoj që qytetarët e vendit me këtë pjekuri do vendosë se si do udhëhiqet Kosova në etapat e reja. Forcat politike i kanë gjitha mundësitë me bashkëpunu e me i ofru vendit koncept zhvillimor. Jemi bashku me PSD-në, jemi të hapur edhe me Nismën e AKR-në”.
Tutje ish-kryeministri Ramush Haradinaj e ka vlerësuar si pjekuri politike shpërndarjen e parlamentit. “E vlerësoj si shenjë të pjekurisë politike vendimin e sotëm. Me shpërndarjen e Kuvendit kjo është një dëshmi e pjekurisë politike. Kësisoj besoj shumë që qytetarët e vendit, Kosova, me këtë pjekuri do ta shfrytëzojë të drejtën e saj me vendosë se si do të udhëhiqet Kosova. Në ditën kur kam dhënë dorëheqje e kam ditë se do të vijë kjo ditë. Më vjen mirë që shkoi me kaq shkallë të madhe të pjekurisë. Jemi të hapur për Nismën dhe AKR-në. Do të bashkëpunojmë edhe me këto subjekte politike në bazë të vullnetit të tyre. Unë nuk jam më kryetar Qeverie. Nuk kam të drejtë të jem në sallë”, tha Haradinaj.
Në vijim Haradinaj pohoi se nuk është pishman që ka krijuar Qeverinë me PDK-në duke shtuar se ka kryer punë të mira. “Qytetarët duhet të fokusohen te konceptet politike. Nuk jam pishman për koalicionin qeverisës”, është shprehur Haradinaj.
