Ditën e djeshme është zhvilluar ceremonia e hapjes së Ambasadës Japoneze në Tiranë.
Të pranishëm në këtë ceremoni ishin ministri japonez i shtetit për Punët e Jashtme të Japonisë, Nobuo Kishi, ambasadori i parë japonez në Shqipëri, Makoto Ito, ministrja e Zhvillimit Ekonomik, Turizmit, Tregtisë dhe Sipërmarrjes, Milva Ekonomi, ministri i Punëve të Jashtme të Shqipërisë, Ditmir Bushati, deputetë dhe personalitete të tjera.
Në fjalën e saj, ministrja Ekonomi përshëndeti hapjen e ambasadës Japoneze në Tiranë, duke theksuar se vetëm pak kohë më parë u arrit të firmosej një marrëveshje mes MZHETTS dhe Qeverisë Japoneze, për mbështetjen e një projekti në zonat rurale të Shqipërisë.
“Ky projekt, në zonat ku nuk ka akses finance, është një demonstrim i një miqësie reale dhe i një mirësie që vjen nga qeveria Japoneze, për të mbështetur Shqipërinë dhe për të treguar bashkëpunimin mes dy vendeve”, tha Ekonomi.
Ndërsa, ministri Bushati theksoi se hapja e Ambasadës japoneze tregon se do kemi një rritje të bashkëpunimit dypalësh, shkëmbimeve ekonomike e kulturore dhe kontakteve mes dy popujve.
Nga ana e tij, ministri japonez i shtetit për Punët e Jashtme të Japonisë, Nobuo Kishi, theksoi interesin e madh të Japonisë për Ballkanin Perëndimor, ku Shqipëria është faktor stabiliteti.
Ministrat Bushati dhe Kishi morën pjesë edhe në ceremoninë e dhurimit nga Qeveria Japoneze të 129 automjeteve japoneze të prodhimit të fundit, një donacion i mundësuar nëpërmjet një granti prej 500 milionë YEN ose 4.6 milionë dollarë.
