Sot janë hapur 600 shkolla publike në vendin tonë, ku procesi mësimor do të jetë i diktuar nga rregullat e pandemisë. Bëhet fjalë për ata nxënës që nuk kanë ndjekur mësimin online.
5400 nxënës do të ulen sot në bankat e shkollës, pas një ndërprerje disa mujore për shkak të koronavirusit.
Nxënësit e klasave të para deri në të pestat, do të plotësojnë njohuritë për dy javë deri në nisje të vitit të ri shkollor. Më pas në datën 14 shtator, do të nisë procesi mësimor për të gjithë nxënësit e tjerë, në sistemin parauniversitar.
Ministria e Arsimit ka njoftuar se viti i ri shkollor do të startojë më 14 shtator, ndërsa ka vënë në dukje se në datën 31 gusht deri në 11 shtator do të zhvillohen mësime plotësuese vetëm me nxënës të klasave nga 1-5. Kjo për ata të cilët nuk kanë pasur akses dhe mundësi gjatë periudhës së mësimit online.
