Napoli ka përfituar në mënyrën më të mirë të mundshme nga gabimi që bëri Interi i Spalletit mesditën e sotme ku u mposht nga Udinese në shtëpi. Të kaltrit e Sarrit kanë mposhtur Torinon me rezultatin 1-3, ku të tre golat janë shënuar në pjesën e parë për të marrë në këtë mënyrë edhe kryesimin e Serie A pas dy javësh.
Serinë e golave e hapi mbrojtësi Koulibaly në minutën e 4-t ndërsa Zielinski dhe Hamsik në gjysmë oren e parë e çuan rezultatin në 0-3. Për sllovakun ky ishte goli i 115-të në karrierë me fanellën e Napolit, me Hamsik që hyri në histori pasi barazoi Diego Armando Maradonën në krye të listës së golashënuesve më të mirë të të gjitha kohërave te skuadra jugore. Golin e nderit për Torinon që u rikthye me këmbë në tokë pas fitores ndaj Lazios e realizoi Belotti në minutën e 65-të. Pas 17 javëve të para Napoli kryeson Serinë A me 42 pikë, 2 më shumë se Interi.
