Anëtari i Autoritetit për Informimin mbi Dokumentet e ish-Sigurimit të Shtetit, Daut Gumeni, ka rrëfyer një rast skandal që i ka ndodhur para pak kohësh, gjatë një telefonate me një punonjëse në Ministrinë e Drejtësisë.
I ftuar në emisionin “Studio e Hapur”, Gumeni rrëfeu një rast kur kishte telefonuar për të pyetur në lidhje me shpërblimet, por ishte skandalizuar nga përgjigja e marrë.
“Mora në telefon një ditë në Ministrinë e Drejtësisë. Dhe më e keqja është se qe grua. Unë kam një bindje që ne si popull na kanë mbajtur gjallë gratë zonja dhe një gjuhë e madhe. S’e prisja nga një grua. I thashë jam filani. Thonë që do fillojnë ato shpërblimet që na i ka dhënë parlamenti, s’i kemi kërkuar ne. ‘Kush jeni ju’ tha, filani i thashë unë. ‘A hala s’keni ngordh ju’, tha. Dhe kjo paguhet nga shteti që e quan veten demokrat. Nuk e pyeta më se cila qe se pastaj duhej të prishja gojën. Ajo nuk e thotë sepse është e paedukatë, por e thotë sepse ajo është fryma”, shprehet Gumeni.
