Ish-deputeti e ish-kreu i degës së PD Tropojë, Azgan Haklaj, në një dalje televizive tha se në protestën e 8 janarit, një person ishte ngjitur me shkallë dhe ishte i pajisur me thikë për të vrarë kryetarin e Partisë Demokratike. Sipas tij, ansambli i dhunës sado që u përpoq, iku me bishtin ndër shalë. Pas deputetit demokrat Dashnor Sula, se në 8 janar ishte planifikuar vrasja e Lulzim Bashës, për një skenar të ngjashëm ka folur edhe ish-deputeti e ish-kreu i degës së PD Tropojë, Azgan Haklaj.
“Kam bërë një denoncim publik që Ministri i Brendshëm dhe ish-kryeministri janë në krye të strukturave që po përgatiten për të shkelmuar Partinë Demokratike, dhe kështu ka ndodhur fatkeqësisht.
E kam bërë dhe një tjetër deklaratë publike që do zbarkojnë amerikanë të tjerë këtu, dhe thashë që janë ushtarë. Ndërkohë shtabi qendror i zyrës operacionale të NATO-s është këtu. Tani të kthehemi te Partia Demokratike dhe te grushti i shtetit. Unë s’jam as prokurori e as gjykatësi që të ndaj, unë shoh në këndvështrimin tim.
Aty ka pasur një simfoni dhune, dhe unë nuk flas me hamendësime. Aty ka qenë Garda e Republikës për të mbrojtur zyrat dhe kryetarin e Partisë Demokratike. Me thikë në dorë, personi i ngjitur në shkallë ishte për të vrarë kryetarin e PD. Ishte shumë pranë zyrës së tij. Por, ansambli i dhunës iku me bisht ndër shalë”, tha Haklaj.
Dy ditë më parë, deputeti demokrat Dashnor Sula, gjatë një debati me deputetin Edmond Spaho deklaroi se më 8 janar turma ishte përgatitur për të vrarë Lulzim Bashën brenda selisë së Partisë Demokratike, dhe nëse do ishte hapur dera, do kishte kasaphanë.
Sipas Sulës, protestuesit e karikuar për dhunë atë ditë do të vrisnin Lulzim Bashën. Ndërsa deklarata e tij është kundërshtuar nga Spaho, i cili thotë se Basha mbrohet nga Garda.
Pjesë nga debati:
Dashnor Sula: Pas datës 8 janar, i gjithë opinioni publik e di. Nga ai moment që të arrihet të përplasen vëllezër me vëllezër, nuk ka bërë vaki kurrë të thërritet.
Edmond Spaho: Deri dje thonit policia e krimit…
Dashnor Sula: Shyqyr që ka qenë ajo derë, se ti s’do flisje këtu sot. Do ishte kasaphanë aty brenda.
Edmond Spaho: Do vriteshin deputetë?
Dashnor Sula: Jo ti, po njerëzit tuaj të karikuar do të vrisnin Lulzim Bashën
Edmond Spaho: Bashën e mbron Garda.
Dashnor Sula: Para se të shkoje në “Foltore”, i merrje ti vendimet, për Kullurin e të tjerë
