Talo Çela lëvizte me makina luksoze në qendër të Tiranës. Ish-drejtori i Përgjithshëm i Policisë, Gledis Nano, informohej për lëvizjet e tij, fakt që vërtetohet edhe nga një email i cili është shpërndarë në rrjetet sociale pas hakerimit të emailit të tij. Gledis Nanos njoftohej nga një burim se Talo Çela është parë nga makinë me një femër dhe një fëmijë, ndërsa edhe herë të tjera ka qenë vetëm.
Në muajin gusht të vitit 2021, Njësia Anti-Terror, e cila drejtohej Gledis Nano ka mbledhur informacione për të shumëkërkuarin Talo Çela.
“Më datën 5 gusht 2021 pas orës 20.00 ai ka shkuar tek Hotel Viktoria-s Rooms me adresë tek “Rruga e Dibrës”. Atje ai ka shkuar i shoqëruar nga tre persona të tjerë, të cilët kishin në përdorim një mjet tip golf ngjyrë gri, kurse vetë udhëton me një mjet tip Audio Q8 ngjyrë blu të errët me targa gjermane”, thuhet në shkresë.
Në dokument thuhet se Çela lëvizte me një Audi Q8 ngjyrë blu dhe është parë një herë të lëvizë me një grua në makinë.
“Burimi ka informuar se në këtë objekt, Talo Çela ka qenë dhe para dy javësh, rreth datave 25-26 korrik 2021. Herën e parë, Talo është parë në makinë me një femër dhe një fëmijë kurse më datën 5 ka qenë vetëm. Sipas informacionit, Talo Çela ka marrë kontakt me shtetasin Ervin Mata.
Sipas burimit, Ervinit i kanë thënë se me këtë duhet pasur kujdes se ka shumë kundërshtarë dhe se mund ta vrasin. Ervini i është përgjigjur që le të bëjnë çfarë të duan, për mua ka rëndësi që të mos më ndodhë ngjarje tek objekti im. Burimi i informacionit dyshon se Ervin Mata mund ta përdorë Talon për të eliminuar ndonjë nga kundërshtarët e tij. Ju bëjmë me dije se nga ana jonë është këmbëngulur se sa të sigurt e ka burimi këtë informacion dhe ai ka ngulur këmbë se është tepër e sigurt për këto takime dhe personi që e ka vënë në dijeni është lidhje e afërt e Ervin Matës dhe ngul këmbë që të ruhet, pasi është një ndër personat e pakët që ka dijeni për takimet e Talos me Ervin Matën”, thuhet në shkresë.
Talo Çela akuzohet për një mori vrasjesh në Shqipëri, ndërsa prishja e pazareve me Nuredin Dumanin i ktheu aleatët e djeshëm në armiq të betuar. Policia dyshon se Dumani erdhi pikërisht për të ekzekutuar Talo Çelën në maj të vitit 2022, por u tradhtua dhe Talo Çela shkoi t’i bënte atentat duke e plagosur.
