Ish-drejtuesi i Prokurorisë së Apelit të Tiranës dhe kryetari i shoqatës së prokurorëve shqiptarë, Shkëlqim Hajdari deklaroi se në objektivin e SPAK-ut janë edhe krerët më të lartë të politikës, të konsideruar si ”peshqit e mëdhenj”. Deklarata e Hajdarit u bë ditën e sotme në emisionin ”Top Talk” në Top Channel.
Hajdari është shprehur shenjat e SPAK janë pozitive, teksa shtoi se mbështetja e ndërkombëtareve do të jetë absolute për këtë institucion, dhe për reformën në drejtësi në tërësi.
Sipas Hajdarit, prej shumë vitesh, politika ka bllokuar hetimet e Prokurorisë, por kur një prokuror ka prova për dikë, nuk pyet se kush është ai person, dhe duhet të ushtrojë detyrën e tij.
Shkëlqim Hajdari: Kur prokurori ka prova nuk pyet se kë ka emër para. Kur ka prova nuk pyet se kush është emri që ka nën akuzë me kusht që atij të mos i cenohet jeta, vendi i punës dhe të ishte pjesë e karrierës së tij suksesi që arrinte. Sot këto tre gjëra, prokurorët e posaçëm dhe gjyqtarët kundër krimit të organizuar dhe korrupsionit i kanë të garantuara. Për zyrtarët qeveritarë që janë në hetim, si është një dosje nuk është një tjetër. Një merr më shumë kohë, një ka më pak prova.
Shenjat e SPAK janë pozitive, mbështetja ndërkombëtare do të jetë absolute. Nëse një njeri ka të siguruar jetën, karrierën dhe të mirat materiale do punojnë. SPAK do hetojë pa dallim duke parë zyrtarë majtas apo djathtas. Politika deri tani tregoi demokracia ka një gjë që të keqen nuk e riciklon kurrë.
Sistemi që kemi ndërtuar do japë rezultate të shkëlqyera. Rrjetat janë tërhequr për peshqit e mëdhenj dhe kur të tërhiqen, do të dalin edhe të mëdhenj, edhe të vegjël. Marinarët kanë kaluar të gjithë teste për të qenë marinarë të zotë.
