Ish-drejtuesi i Prokurorisë së Apelit të Tiranës dhe kryetari i Shoqatës së Prokurorëve, Shkëlqim Hajdari tha sot se kryeprokurorja e përkohshme Arta Marku nuk ka shkelur asnjëherë ligjin, s’ka të dhëna.
I ftuar në “Report Tv”, Hajdari ka komentuar lëvizjet e fundit të kryeprokurores Marku për të cilat tha se nuk ka prononcim kundër kryeprokurores nga faktori ndërkombëtar. Ai shpjegon se kjo mbështetje e ndërkombëtarëve vjen se ata e njohin shumë mirë situatën në Shqipëri.
“Nuk ka prononcim kundër Markut nga faktori ndërkombëtar, sepse e njohin shumë mirë situatën. Marku nuk ka shkelur asnjëherë ligjin, s’ka të dhëna. Këto të dhëna duhet të na bëjnë optimistë,” deklaroi Hajdari.
Ndërkohë, Hajdari ka folur edhe për gjendjen në të cilën ishte prokuroria para se të vinte në detyrë Marku. Ai thekson se 90% e prokurorëve donin reformim në organin e akuzës. Hajdari deklaron se ish-kryeprokurori Adriatik Llalla nuk e ka dashur kurrë reformën në drejtësi duke punuar për ta bllokuar atë. Hajdari thotë se tani gjithë veglat qorre të Llallës do të kalojnë në Vetting.
“Duhet të themi çfarë gjendje ka gjetur Marku organin e akuzës. Deri kur dhashë dorëheqjen, unë u vura në pamundësi për të ushtruar detyrën e prokurorit. Isha kryetar i shoqatës së prokurorëve dhe drejtues i Apelit. Unë bëra një sondazh pa autoritetin e Llallës, ku iu bëmë pyetjen: Si e shikoni Prokurorinë? Pas testimit 90% e prokurorëve donin reformim.
Unioni i Prokurorëve është një ndër gjërat më të pista që ka përdorur politika, duke iu mbyllur zërin prokurorëve për reformën në drejtësi. Është krijuar natën në vitin 2016.
Adriatik Llalla është në çdo centimetër për të bllokuar reformën në drejtësi. Ai nuk e ka dashur kurrë reformën në drejtësi. Llalla, dy garancitë që ishin fituar me shumë mund në 2009, nuk i zbatoi asnjë ditë. Ka shkarkuar e lëvizur prokurorë pa asnjë lloj arsyetimi, studimi.
Këto janë një seri shkeljes, që kanë të bëjnë me funksionin administrativ të kryeprokurorit. Tani gjithë njerëzit, veglat qorre të Llallës, do kalojnë në Vetting. Këtë situatë ka gjetur Marku, kur ka marrë drejtimin e Prokurorisë së Përgjithshme”, deklaroi Hajdari.
