Këto ditë kanë qënë mjaft intesive për “Fundjavë Ndryshe”, ndërsa vullnetarët janë shpërndarë në zonat e shkatërruara nga tërmeti. Puna kanë qenë kolosale, e kjo nismë ka dhënë frytet e veta edhe falë ndihmës së pakursyer të kontribuesve.
Shqiptarët treguan në këto orë të vështira se falë bashkëpunimit me njëri-tjetrin, mund të behet edhe më shumë. Dhimbjen e kthyen në forcë, duke u solidarizuar për të mbledhur fonde për të prekurit nga tërmeti, ndërsa bilanci ishte tragjik. Fondacioni “Fundjavë Ndryshe”, deri më tani ka arritur që të mbledhë rreth 2 milionë dollarë.
Drejtuesi i “Fundjavë Ndryshe”, Arbër Hajdari, mbrëmjen e sotme në emisionin “Real Story”, u shpreh se shumë qytetarë kanë shtrirë dorën për ndihmë. Këtu ai solli në fokus rastin e një familje që kishte humbur familjarët nga tërmeti i 26 nëntorit, dhe kishte kërkuar para për të mbuluar ceremoninë mortore.
Mes të tjerash, Hajdari tha se “Fundjavë Ndryshe” nuk do të pranojë të bashkojë fondin me qeverinë, pasi humbet autonomia e organizatës. Themeluesi i “Fundjavë Ndryshe”, nënvizoi se koha është mjaft e shtrenjtë, ndaj nuk do të presë shumë gjatë qeverinë, pasi do të nisë nga puna për ndërtimin e banesave të të prekurve.
Pak ditë më parë, kryeministri Rama mblodhi Komitetin Kombëtar të Rindërtimit pas tërmetit, që shënoi pasoja fatale. Në këtë tryezë ishte i pranishëm edhe drejtuesi i Fondacionit “Fundjanë Ndryshe”, Arbër Hajdari, ku mes të tjerave nënvizoi rëndësinë e trasparencës. Moderatori i emisionit, Sokol Balla, e pyeti Arbër Hajdarin në lidhje me një fërkim që pati me kryeministrin. Hajdari sqaroi se kjo gjë ndodhi kur u hodh ideja e bashkimit të fondeve, pasi humbet qëllimi i organizatës.
“Janë mbledhur rreth 2 milionë dollarë. Kishte dhe njerëz që shkruanin dhe kërkonin para për mortin. Kemi paguar gjithë drekën dhe mortin për një familje, kafet. Pra të gjitha gjërat që duhen për të përcjellë njerëzit.
Unë mendoj se ditën që pati takim, pati vetëm një fërkim. Fërkimi ishte kur Rama hodhi idenë e bashkimit të fondeve. Siç e kam theksuar dhe atë ditë, ajo gjë nuk mund të ndodhë, që të bashkojmë fondin, pasi humbet qëllimi i organizatës.
Ne kemi arritur që të ndërtojmë shtëpi për 11 ditë, kemi eksperiencën. Ne kemi 32 mijë persona që kanë kontribuar. Kanë qenë një numër i madh njerëzish. Ne si lëvizje, kemi dëshirë që deri në fund këtë proces ta kemi transparent. S’më intereson fare të kontrollojë shtetin në këtë proces, por të koordinohemi.
Mos të kemi nevojë për leje ndërtimi. Kemi nevojë për koordinim që ndihmat mos të shkojnë dy herë. Nuk mund të na presë ne koha të diskutojmë në tryeza, kur një pjesë e njerëzve janë nëpër çadra. Komiteti të nxjerrë disa konkluzione, që të nisim punën. Ne se presim shtetin, siç nuk e kemi pritur, ata kanë korsinë e tyre”, tha më tej Arbër Hajdari.
