Lidhur me zgjerimin e mundshëm të Greqisë në detin Jon, ka folur së fundmi në cilësinë e juristit dhe konstitucionalistit Z. Shkëlqim Hajdari, i cili vlen të theksohet se është një njohës i mirë i kësaj çështje, veçanërisht i marrëveshjes së 2009-ës.
Hajdari komentoi në studion e “News24”, në rubrikën “Opinion” çështjen në fjalë, teksa specifikoi se kufiri detar i Greqisë, nuk do jetë kurrë 4 milje nga bregu i Dhërmiut-Vunoit- Himarës- Borshit.
Ndër të tjera, ai i mëshoi faktit se nëse do përfundojmë nëpër Gjykatat Ndërkombëtare, e drejta ka për të qenë me palën shqiptare.
Pjesë nga deklarata e Z. Hajdari:
“Ne kemi një praktikë të konsoliduar ndërkombëtare.
Shtetet kanë ndarë territoret detare, gjithë Mesdheu ka pasur probleme dhe ka një përvojë të madhe ndërkombëtare.
Unë shpresoj dhe dëshiroj që mos të përfundojmë në Gjykatat Ndërkombëtare. Nëse do të shkojmë nëpër Gjykatat Ndërkombëtare e drejta ka për të qenë me palën shqiptare.
Kufiri i Greqisë me Shqipërinë do konsiderohet Korfuzi për arsye pa fund.
Historia jonë me Greqinë nga pikëpamja juridike, kushtetuese dhe përvojës ndërkombëtare është e qartë.
Duhet që pala shqiptare të jetë e përgatitur dhe për mendimin tim është e përgatitur! Me Italinë për shembull ne nuk kemi probleme. Gjatësia është e madhe, është 40 milje.
Me Greqinë është specifike.
Bisedimet do zgjasin, nuk do të jenë të lehta sepse secila palë do të kërkojë të marrë maksimumin, por një gjë, pasi e kam menduar shumë, e kam konsultuar edhe me shumë njerëz të së drejtës ndërkombëtare, por edhe me burra intelektualë dhe patriotë, është që territori grek nuk do të vijë 3-4 km para Himarës, Palasës, Dhërmiut, Vunoit etj. Jam i bindur për këtë pjesë! Kufiri detar i Greqisë, nuk do jetë kurrë 4 milje nga bregu i Dhërmiut-Vunoit- Himarës- Borshit”.
