Themeluesi i fondacionit ”Fundjavë Ndryshe”, Arbër Hajdari foli në një lidhje direkte në emisionin ”Open” në ”Top Channel”, ku tregoi për ecurinë e rindërtimit të banesave të cilat u dëmtuan nga tërmeti tragjik i 26 nëntorit.
Hajdari tha se ”Fundjavë Ndryshe” ka blerë 14 apartamente në Tiranë dhe Durrës.
Ai u shpreh se paratë për të rindërtuar banesat në Vaqarr janë gati, por nuk janë pajisur me leje ndërtimi nga autoritetet përkatëse.
“Fundjavë Ndryshe ka blerë 14 apartamente në Tiranë dhe në Durrës. Jemi në pritje të lejes për ndërtim në Vaqarr. Ne i kemi pasur lekët gati që në janar, por akoma nuk kemi leje. Fundjavë Ndryshe ka bërë shumë më shumë sesa ka premtuar”- tha Hajdari.
Sipas tij, qeveria duhet të ishte treguar më e shpejtë në dhënien e shesheve të ndërtimit.
”Unë mendoj se qeveria shqiptare duhej që së pari të merrej me hapa shumë më të shpejtë për të na vënë në dispozicion sheshet e ndërtimeve. Ne jemi norganizata që punojmë në lirinë tone, në autonominë tonë dhe kemi bërë 10-fishin e shtëpive që kemi pasur obligim”, përfundoi Hajdari.
