Ramush Haradinaj sapo ka përfunduar intervistimin nga prokurorët e Dhomave të Specializuar në Gjykatën Speciale, në Hagë.
Haradinaj tha se ka qenë i ftuar si i dyshuar, duke shtuar më tej se janë procedura ligjore, dhe se nuk ka asgjë për të fshehur ndaj qytetarëve.
“E kam kryer obligimin ligjor, si i dyshuar. Kam pranuar këshillën ligjore, që mos të përgjigjem për ç’ka jam pyetur. Këto janë procedura ligjore, jo për të fsheh diçka nga publiku, por meqë ligji nuk ma lejon… “, ka thënë Haradinaj.
Në një prononcim për mediat, Haradinaj deklaroi se arsyeja e dorëheqjes ka të bëjë me nocionin e shtetit dhe sovranitetit.
“Arsyeja e dorëheqjes ka të bëjë me nocionin e shtetit, e sovranitetit. Nuk kam dashur ta sjell kryetarin e shtetit këtu. Meqenëse shteti ka mbetur shtet, dhe meqenëse nuk kam obligime, do të kthehem si të gjithë kolegët e tjerë në politikë, t’u ofrohem qytetarëve.
E kam bërë atë që e kam vlerësuar të rëndësishme, sepse kryetari i Qeverisë kur del para hetuesve ka dalë Qeveria, shteti, duhet të kemi kujdes për këtë. Kam dhënë shembull të respektimit të ligjit. Nuk po jap leksione, e kam bërë detyrën time”, ka thënë Haradinaj.
