“E kërkonin në qiell dhe rezulton në tokë”. Kjo fjali zë vend për rastin e Lulzim Berishës. Ky i fundit është personi që ngriti më këmbë policinë dy ditë më parë. Efektivët bastisën në shtëpinë e tij, ku bënë kontrolle për sende të jashtëligjshme. Policia donte të arrestonte të “bosin” për ta marrë në pyetje por pa rezultat.
Ndonëse u tha se Lul Berisha mund të ishte larguar bashkë me familjen në një vend të BE-së ai me sa duket qenka në Durrës. Kjo pasi sot është paraqitur në Shërbimin e Provës duke zbatuar vendimin e Gjykatës. Sipas këtij vendimi, Lul Berisha i liruar me kusht duhet të mbajë kontakte me Shërbimin e Provës.
Mbrëmjen e së dielës, Policia e Shtetit ushtroi kontroll në banesën e Lulzim Berishës. Por, gjatë kontrollit ai nuk u gjet në banesë. U tha se së bashku me familjen e tij, Lul Berisha ishte larguar nga Shqipëria drejt një vendi të BE-së, disa kohë më parë.
Pas aksionit për kapjen e tij, avokati i Lulzim Berishës, Detar Hysi, thotë se Gjykata e Krimeve të Rënda Tiranë nuk ka caktuar asnjë masë sigurimi “arrest me burg” apo “kërkim policor” dhe nuk ka pasur as vendim për kontroll banese.
Policia ka ushtruar kontroll në banesën e tij, sipas avokatit dhe nuk ka gjetur asgjë të kundërligjshme.
“Për këtë shtetas, Gjykata e Krimeve të Rënda në Tiranë nuk ka caktuar as masë sigurimi ‘arrest me burg’, as ‘kërkim policor’ dhe as nuk ka ndonjë vendim për kontroll banese. Megjithatë, Policia ka ushtruar kontroll në banesën e tij dhe nuk ka gjetur asgjë”, thotë avokati Hysi.
