Tashmë fushata ka filluar dhe duket se gara mes partive të koalicionit qeveritar, LSI dhe PS është mjaft e ashpër.
LSI-ja pretendon të dalë forcë e parë politike, Rama bëri marrëveshje me Bashën, ndërsa kryeministri thotë se PS-ja nuk ka nevojë të dalë forcë e parë, sepse është e tillë.
Duket se kemi të bëjmë me një spostim të Metës, duke qenë se ky i fundit mori postin e Presidentit, ndërsa deputetja Monika Kryemadhi ka sulmuar Ramën dhe Bashën. Me anë të një postimi në Facebook, Kryemadhi nuk përmend emra, por shkruan se “sakrifica e njerëzve eklipson çdo shtrëngim duarsh mes politikanëve që në thelb kanë interesat e ngushta të vetes, familjes apo miqve te tyre politikë.”
Fotoja është mjaft e veçantë, sepse Kryemadhi ka hipur mbi karrocën e një kali, ndërsa përcjell mesazhin e mëposhtëm:
“Rrallë kam parë dhe takuar njerëz kaq punëtorë, që rraskapiten gjithë ditën në punë dhe prapë janë të qeshur si xha Bimi.
Sa më shumë kohë kalon me hallet dhe problemet e tij, aq më tepër e kupton kotësinë e politikës së madhe, të asaj që na shpenzon kohën dhe na shteron energjitë me gjëra pa vlerë.
Sepse përqafimi i këtyre njerëzve që sakrifikojnë çdo ditë për familjet e tyre është më i madh dhe eklipson çdo shtrëngim duarsh mes politikaneve që në thelb kanë interesat e ngushta të vetes, familjes apo miqve te tyre politikë.”/ TIRANA TODAY
