Presidenti i Turqisë, Recep Tayyip Erdogan tha sot se çështja e Palestinës dhe e Jerusalemit nuk është kauzë vetëm e një populli, të një gjeografie apo të një qyteti. Ai vuri në dukje se e ardhmja e njerëzimit do të përcaktohet nga rezultatet e provimit që njerëzimi do t’i japë në rastin e Palestinës dhe Jerusalemit.
“Për shkak të persekutimeve, masakrave dhe padrejtësive ndaj të cilëve u nënshtrohen, palestinezët janë simbol i të gjithë të shtypurve në botë. Ndërsa Jerusalemi i cili përgjatë historisë është qyteti i shenjtë i hebrenjve, të krishterëve dhe myslimanëve është simbol i tubimit rreth vlerave të përbashkëta të njerëzimit. Për këtë arsye, mbrojtja e Palestinës dhe Jerusalemit nënkupton mbrojtjen e të gjitha gjërave të mira, të bukura dhe të drejta. Në qoftë se nga ky provim mund të dalim me një sukses të ndershëm, atëherë si njerëzim mund të shohim me siguri edhe shpresë në të ardhmen tonë. Nëse ndodh e kundërta atëherë neve mund të na presë një e ardhme e errët ku mbizotëron persekutimi dhe ku nuk ka të drejta, liri, dhe të gjitha dimensionet morale dhe të ndërgjegjes“, tha presidenti Erdogan.
Erdogan gjatë fjalimit të tij po ashtu u shpreh se ato që po përjetohen në Palestinë, sidomos në Jerusalem nuk është diçka tjetër përveç përpjekjes për legjitimitet madje edhe institucionalizim të persekutimeve të mizorëve.
“Dhuna e ushtruar nga qeveria izraelite ndaj palestinezëve të cilët nuk kërkojnë asgjë përveç mbrojtjes së tokave të tyre, tregon se guximi i mizorëve po rritet çdo ditë e më shumë. Indiferenca e treguar nga komuniteti ndërkombëtar ndaj asaj që po përjetojnë palestinezët, ku dhjetar prej tyre ranë dëshmorë kurse mijëra të tjerë u plagosën është shenjë për një të ardhme ku asnjë popull, asnjë individ nuk do të jetë në siguri”, tha ai.
“Ne do të jemi paditës në të dy botërat ndaj qeverisë së Izraelit, i cili emrin e Palestinës dhe Jerusalemit, të cilat duhet të jenë qendra e paqes së njerëzimit, i radhiti pranë persekutimit“, tha Erdogan.
“Ato që po përjetohen në Palestinë dhe në Siri, na treguan të vërtetën e hidhur. Ne i njohëm mirë këta, po i njohim mirë, i dimë mirë dhe nuk është e mundur t’i harrojmë ato që na kanë thënë në takimet dypalëshe. Tek këta nuk ka as krijesë, as karakter njerëzor, as ndërgjegje“, theksoi Erdogan.
Përkundër asaj që sot Turqia është ekonomia me 17-të më e madhe në botë, sipas të dhënave të vitit të kaluar Erdogan theksoi se Turqia me siguri ndodhet në vendin e parë sa i përket ndihmave humanitare.
“Atëherë pse shtetet të cilat garojnë mes vete kur thuhet fuqi ekonomike, politike dhe ushtarake, e që janë në madhësi sa dyfishi, pesëfishi, dhjetëfishi i shtetit tonë, mbeten prapa nesh kur përmenden ndihmat humanitare? Sepse ndihma humanitare e cila është një punë plotësisht e ndërgjegjes dhe moralit, nuk sjellë para, nuk sjellë naftë, nuk sjellë ari, nuk sjellë fuqi politike. Këta janë aty ku ka diamant, ari dhe naftë për ta“, tha ai.
Presidenti Erdogan gjatë këtij eventi bëri të ditur se deri më tani kanë ofruar ndihmë prej 31 miliardë dollarë për sirianët të cilët ndodhen në Turqi.
