Kryetari i Unionit të Shteteve Afrikane, Moussa Faki Mahamat, raporton se trupat ushtarake në Mali kanë arrestuar presidentin e vendit, Ibrahim Boubacar Keita, disa orë pasi kishin kapur dhe kryeministrin Boubou Cisse.
Moussa Faki Mahamat dënoi ashpër lajmin e arrestimeve duke e cilësuar si një grusht shteti. Ai bëri thirrje që “ushtarët kryengritës të ndalojnë menjëherë përdorimin e forcës”. Gjithashtu, ai i bëri apel komunitetit ndërkombëtar të kundërshtojë përdorimin e forcës në Mali.
Sot turmat e njerëzve kishin dalë në rrugët e kryeqytetit Bamako, duke rrethuar monumentin e pavarësisë, ndërsa një ndërtesë në pronësi të ministrit të drejtësisë së vendit u dogj dhe u grabit.
Trazirat në kryeqytetin e Malit erdhën pas raportimeve për kryengritje në një bazë ushtarake 15 km jashtë kryeqytetit, njoftonte një burim për rrjetin CNN, i cili tha se nga kampi ushtarak i Kati, kishte nisur edhe grushti i suksesshëm i shtetit në 2012.
Presidenti 75-vjeçar Keita përballet me pakënaqësi të gjerë publike që prej majit kur gjykata kushtetuese anuloi rezultatin e zgjedhjeve të kontestuara.
