Një ngjarje aspak e hijshme ndodhi tre ditë më parë gjatë një takimi të Bashës me qytetarë të Pogradecit, ku një 67-vjeçar u godit me grusht nga bodigardi i kreut të PD-së.
Qytetari është identifikuar si Vasil Buzo, 67 vjeç, i cili ka treguar për Sot7 se çfarë foli me Bashën, që shoqëruesi i tij reagoi në atë mënyrë.
“Unë atë ditë e takova, më tha si je? Mirë i thashë unë. Më datën 16 e di që kemi protestë, por në datë 17 nuk e di çfarë do bëhet, kush do ta marri? Ai më tha, unë do ta marr, kush do ta marrë, populli tha.
Cili popull i thashë unë, ti? Ti vodhe Rrugën e Kombit 300 milionë euro, plus asaj vrave edhe 4 veta në Tiranë. E këtë kohë, ai u shkëput nga unë dhe bodigardi i tij që ishte në krah erdhi dhe më goditi.”
67-vjeçari tregon se grushti i bodigardit ishte i fortë, por ai është tërhequr mbrapa pasi në të kundërt do të kishte rënë në tokë.
“Më goditi në bark, u spostova unë sepse grushti ishte i fortë. Por të mos isha spostuar, do isha rrëzuar sepse grushti ishte i fortë. Unë nuk dola për asgjë tjetër në këtë shesh, veçse për t’i thënë atë se çfarë i thashë Lulzim Bashës. Unë nuk kërkoj asgjë dhe nuk kisha asnjë lloj qëllimi politik.”
Vasil Buzo përfundon duke thënë se do ta ndjekë çështjen edhe më tej, ai tha se po mundohet të gjejë një avokat për ta paditur Bashën, por e ka të vështirë diçka të tillë sepse nuk ka para për procesin gjyqësor. Megjithatë, ai ka thënë se nuk do e lërë me kaq.
