Zbulohen të tjera detaje në lidhje me organizatën terroriste iraniane që dyshohet se do të kryente akte terroriste në Shqipëri. Celula e cila përbëhej nga 12 persona, në territorin shqiptar ishte përgatitur edhe për t’iu kundërpërgjigjur me armë forcave të rendit, në rast se do të zbuloheshin.
Burime kofidenciale nga SHISH pohojnë se atentatorët kishin si plan arratisje nga vendi ynë drejt Kosovës, pasi të kryenin aktet terroriste. Personi që u monitorua e ndjekur në distancë ka qenë Alireza Neghashazadeh, një ish-anëtar i “MEK”, i cili ka nënën e tij në kampin e muxhahedinëve “Hashraf 3” në Manzë të Durrësit.
“ABC News” ka mësuar nga grupi hetimor se Alireza ka ndihmuar më të dhëna krerët e regjimentit special të Gardës Revolucionare të Iranit, ose të njohur ndryshe si Forcat “QUDS”.
Dyshimet janë se ish-anëtari i MEK ka siguruar foto dhe video nga brenda kampit të Muxhahedinëve në Manzë, nga ku mund të kryhej edhe akti terrorist në mars të 2018, kundër opozitës së në ekzil të Iranit. Veprimtaria terroriste e Alireza u zbulua edhe nga agjencitë ndërkombëtare ligjzbatuese, të cilët kishin faktuar edhe më herët lidhjet e tij me drejtuesin e trupave elitë “QUDS”, Peyman.
Për herë të fundit Alireza Neghashazade ka qenë në vendin tonë rreth 2 muaj më parë me pasaportë austriake, ku dhe pse u ndalua dhe u pyet nga forcat e antiterrorit të Policisë së Shtetit, ai u la përsëri i lirë. Ndërkohë rol të rëndësishëm për realizimin e aktit terrorist që mbeti në tentative do të kishte edhe bosi heroinës Abduselam Turgut.
Shtetasi turk do të siguronte municionet luftarake dhe eksplozivin nëpërmjet lidhjeve me rrjetet kriminale që ka Shqipëri. Turgut, gjithashtu kishte si drejtues Peyman, i cili kishte ideuar sulmin që mbeti në tentativë në kampin e Muxhahedinëve. Anëtari i katërt që është nën hetim u identifikua si Melekzadeh.
Askush nga personat e celulës terroriste nuk është prangosur, dhe ndodhet në vende të ndryshme si Turqi, Iran apo Austri. Për këtë arsye, Policia e Shtetit i ka shpallur në kërkim ndërkombëtar. /abcnews.al
