Deputetët e Komisionit të Rithemelimit të PD-së kanë hartuar një rezolutë për luftën Rusi-Ukrainë. Rezoluta e hartuar do të diskutohet nësër në Parlament, dhe kërkon që të dënohet agresioni rus ndaj Ukrainës, si dhe i kërkohet qeverisë shqiptare të ndihmojë në shpëtimin e jetës së civilëve ukrainas.
Po kështu, kërkohet që Shqipëria të largohet nga nisma “Ballkani i Hapur”, për shkak të Serbisë që nuk dënoi agresionin e Rusisë ndaj Ukrainës.
Deputetët Tritan Shehu, Albana Vokshi, Edmond Spaho, Bujar Leskaj, Belind Këlliçi, Flamur Noka dhe Isuf Cela, të shkëputur nga grupi parlamentar i Partisë Demokratike, si mbështetës të ish-kryeministrit Berisha, i kërkojnë qeverisë largimin nga nisma “Ballkani i Hapur”.
“Kuvendi i Republikës së Shqipërisë i kërkon Qeverisë të largohet menjëherë nga nisma “Ballkani i Hapur” që bie në kundërshtim me interesat kombëtare të Republikës së Shqipërisë…”, thuhet ndër të tjera në projekt rezolutë duke vijuar: Rezoluta të dënojë agresionin rus e përdorimin e armëve të rënda. Rezoluta të dënojë njohjen si shtete të Doneskut dhe Luhanskut. Shqipëria t’i shkojë në ndihmë popullit ukrainas…”.
