Deputeti demokrat Astrit Patozi, ashtu si kishte njoftuar më parë, zhvilloi sot një takim me bazën e Partisë Demokratike në qytetin e Durrësit. Patozi u shoqërua nga dy figura të rëndësishme të partisë demokratike që e kanë shprehur hapur qëndrimin e tyre kundër kryetarit Basha. Besnik Mustafaj dhe Leonard Olli ishin në një linjë me Patozin kur thanë se kërkojnë që të shpëtojnë Partinë Demokratike. Patozi deklaroi se ata janë kundërshtarë të Ramës dhe jo të Bashës. Sipas tij, Basha korri atë që mbolli dhe duhet të jepte dorëheqjen. Ai u shpreh se ata kërkojnë bashkim të PD-së sot. PD duhet të jetë shtëpia e popullit demokrat. Sipas Besnik Mustafaj, ky takim bëhet për të shpëtuar Partinë Demokratike duke e vendosur theksin që kjo parti të zhvillojë një garë të drejtë dhe jo kjo që është duke ndodhur tani. Leonard Olli është shprehur se Basha duhet të mbajë përgjegjësi për humbjen e zgjedhjeve dhe kujtoi se PD nuk është pronë e një individi dhe se sot ajo mori rezultatin më të dobët historik.
Patozi: Ne jemi kundërshtarë të Ramës, jo të Bashës. Janë kushte ekstreme që po kalon PD. Durrësi është barometër i gjendjes së Partisë Demokratike. Qëllimi është bashkimi e ringritja e PD. Ne duam bashkimin e PD-së. Ne humbëm në zgjedhje për vendime që nuk u morën kurrë. Basha në 25 qershor korri atë që mbolli, të jepte dorëheqjen. I kërkova të ikë nga selia, në vend të garës zgjodhi farsën. Selami vetëm sa ka vënë emrin, nuk është kandidat. Në PD duhet të jenë aksionerë të gjithë demokratët. Zvogëlim dhe kufizim i mandatit të kreut të PD. Ne duhet të bëjmë shenjtërimin e statutit, të mos shkelet. Të jetë i përcaktuar në statut dorëheqja së kryetarit në rast humbjesh. Kërkojmë bashkim të PD-së sot. PD duhet të jetë shtëpia e popullit demokrat.
Mustafaj: Jemi këtu për të shpëtuar PD. Ne duam debat për arsyet e humbjes së zgjedhjeve. Duam fushatë të drejtë nga ku do të zgjidhet kreu i ri i PD
Olli: Sot jemi në rezultatin më të dobët historik. PD nuk është pronë e një individi. Në PD ndodhi zerimi i fjalës së demokratëve. Basha duhet të mbajë përgjegjësi për humbjen e zgjedhjeve.
