Për opozitën, dekriminalizimi i zgjedhjeve mbetet prioriteti kryesor. Kështu deklaroi sot kreu demokrat Lulzim Basha, në një prononcim për mediat. Basha akuzoi Ramën si të përfshirë personalisht në operacionet e pastrimit të parave të krimit, si dhe për situatën e rëndë kriminale në vend.
A shkoi edhe më tej teksa theksoi se trafikantët e drogës vendosin kush do jetë në pushtet, apo kush do jetë deputet. Në vazhdën e akuzave, kryedemokrati tha se tashmë kemi operacione fasadë. Sipas tij, Elbasani, Vlora, Fushë-Kruja, Shkodra dhe Tirana, sundohen nga grupet kriminale.
“Pushteti i siguruar nga kriminelët, bëri që Shqipëria të kthehet në një strehë të sigurtë për kriminelët, dhe trafikantët e drogës.
Rama është përfshirë personalisht në pastrimin e parave përmes ndërtimeve në bregdet, e në qendër të Tiranës deri tek Teatri Kombëtar.
Kjo dëshmohet përmes kontrollit politik të drejtësisë, emërimit të Arta Markut. Shërbëtore e bindur e pushtetit të Edi Ramës.
Denoncuesit, gazetarë deri te kreu i opozitës, thirren në Prokurori sepse denoncojnë këto lidhje të politikanëve me krimin.
Pushteti i siguruar nga krimi, shpjegon edhe sjelljen e Edi Ramës.
Pushteti i tij nuk varet nga vota e popullit, por nga kriminelët.
Pasojat e bashkëpunimit të krimit me politikën janë shkatërruese për të ardhmen e vendit.
Trafikantët e drogës vendosin kush do jetë në pushtet, apo kush do jetë deputet.
Në vitin 2006, qeveria e PD çoi brenda 6 muajsh të gjitha bandat. Kurse tani kemi operacione fasadë, kriminelë që nuk kapen. Kriminelë që sundojnë qytete e zona të tjera. Elbasani, Vlora, Fushë-Kruja, Shkodra, Tirana, sundohen nga grupet kriminale.
Aksionet e fundit janë fasadë. Edhe këta që janë arrestuar do të lirohen shumë shpejt, ose do të lehtësohen nga akuzat.
Qeveria ka humbur legjitimitetin.
Krimi i siguron votat Edi Ramës, dhe ky u garanton atyre paprekshmërinë.
Dekriminalizimi i zgjedhjeve është prioritet absolut i PD dhe opozitës. Shqiptarëve u duhet dhënë mundësia që të vendosin me votë të lirë për të ardhmen e tyre”, përfundoi Basha.
