Ministria e Punëve të Jashtme e Kosovës, përgënjeshtroi shkrimet e ditëve të fundit në mediat serbe, për gjoja futjen e grupeve të armatosura nga Kosova në Maqedoni.
“Duke mbështetur në informacionet e siguruara nga institucionet e sigurisë, theksohet se shkrimet e disa ditëve të fundit janë të pavërteta, qëllimkëqija dhe tendencioze që kanë për qëllim destabilizimin e rajonit. Ato janë pjesë e një fushate të lajmeve të rrejshme që kanë për synim dëmtimin e imazhit të Kosovës, thuhet në reagimin e MPJ. Çdo tentativë, e kujtdoqoftë, për të paraqitur Kosovën si gjenerator të destabilitetit dhe pasigurisë, është tendencioze dhe me prapavijë për të realizuar agjendat të cilat kanë për synim destabilizimin e rajonit dhe pengimin e proceseve euro-atlantike, për të cilat Kosova dhe qytetarët e saj janë të orientuar”, thuhet në reagimin e Ministrisë së Jashtme.
Sipas MPJ, këto tendenca, për ta prezantuar Kosovën vend të paqëndrueshëm dhe të pasigurt, kanë për qëllim krijimin e një imazhi negativ për shtetin tonë jo vetëm në aspektin e sigurisë, por edhe përpjekje për të goditur interesat vitale sikurse janë zhvillimi ekonomik, investimet e huaja, partneriteti rajonal, njohjet e reja dhe karakterin demokratik dhe shumë-etnik të Kosovës.
MPJ siguron qytetarët dhe partnerët e saj se Policia e Kosovës dhe institucionet e sigurisë, janë vazhdimisht aktive me masa dhe veprime konkrete në tërë territorin e vendit me qëllim të ofrimit të sigurisë dhe të garantimin e stabilitetit të vendit.
“Falë këtyre angazhimeve dhe profesionalizmit të treguar të institucioneve të sigurisë ndër vite, sot Kosova nuk është vetëm konsumues i sigurisë dhe stabilitetit por edhe një aktor i përfshirë rajonal dhe ndërkombëtar”, përfundon njoftimin e MPJ e Kosovës.
