Gjykata e Posaçme kundër Korrupsionit dhe Krimit të Organizuar ka dhënë vendimin për grupin e Habiljave, të cilët akuzohen për trafik droge dhe grup të strukturuar kriminal.
GJKKO ka dënuar me 10 vite burg Moisi Habilajn, teksa tre pjesëtarët e tjerë të grupit, Meridian Sula, Nezar Seiti dhe Fatmir Minaj janë dënuar seicili me nga 9 vite burg. Të 4 të dënuarit nga GJKKO kanë përfituar nga dënimi i shkurtuar duke e ulur me 1/3.
Prokurorët e SPAK kërkuan 18 vite burg për Moisi Habilajn, edhe pse ky i fundit është në arrati që prej dhjetorit të vitit të shkuar. Ndërsa për Nazer Seitin, Meridian Sulajn dhe Fatmir Minajn, hetuesit kërkuan nga 15 vite heqje lirie për secilin.
Vendimi është dhënë gjatë seancës së zhvilluar ditën e sotme në mungesë të vetë Habilajt, i cili është shpallur në kërkim ndërkombëtar pasi u arratis në Itali, teksa ndodhej nën masën “arresti shtëpie”.
Gjykata e Apelit e Katanias e dënoi Habilajn pak kohë më parë, me 15 vite e 5 muaj burg, dhe para se të ekzekutohej vendimi, ai ishte caktuar në “arrest shtëpie”, pasi kaloi 954 ditë pas hekurave.
Pala italiane ka kërkuar nga autoritet shqiptare të vazhdojë kontrollet pasi ka dyshime të arsyeshme se Moisi Habilaj është larguar nga Italia për t’u fshehur në Shqipëri. Aktualisht në Itali ndodhet Nezar Seitaj me masën e sigurisë arrest në shtëpi dhe për hetuesit në Katania ai konsiderohet si financieri i grupit kriminal.
