Paraja, pushteti dhe fama mund ta prishin karakterin e njeriut. Përgjatë gjithë historisë, bota ka pasur në krye shumë njerëz me ndikim, të cilët kanë pasur disa fiksime apo zakone të çuditshme. Për disa prej tyre, sjellje të tilla ekscentrike shfaqeshin në formën e manive të rrezikshme. Ja cilët ishin disa prej tyre:
Mbreti i Prusisë, ishte i fiksuar pas ushtarëve tepër të gjatë
Mbreti Fridrih Vilhelm I e sundoi Prusinë gjatë viteve 1713-1740. Gjatë asaj periudhe, ai e zgjeroi ushtrinë prusiane nga 38.000 në 80.000 trupa. Por ai pati si prioritet krijimin e regjimentit të tij personal, me ushtarë shumë më të gjatë sesa normalja. Ata njiheshin zyrtarisht si “Granatjerët e Mëdhenj të Potsdamit”.
Rekrutët e këtij regjimenti duhej të përmbushnin vetëm një kriter:të ishin të paktën 1 metër e 83 centimetra të gjatë. Sapo bëheshin pjesë e këtij regjimenti special ata trajtoheshin shumë mirë, duke pasur ushqimet, pagat dhe uniformat më të mira të ushtrisë.
Mbretëresha Huana I e Kastiljes, jetonte me kufomën e ish-bashkëshortit të saj
E njohur edhe si “Huana e Çmendur”, ajo ishte vajza e Mbretëreshës Isabela I të Kastiljes dhe Mbretit Ferdinandit II të Aragonës. Ajo u martua me Filipin e Bukur të Austrisë qëkur ishte adoleshente. Por Filipi nisi ta tradhëtonte shpesh gruan e tij, gjë që e zhyti Huanën në depresion.
Kur Filipi vdiq në vitin 1506 në moshën 28-vjeçare, gjendja psikologjike e Huanës u rëndua edhe më shumë. Dëshmitarët e kohës raportuan se ajo e përkëdhelte dhe e puthte vazhdimisht kufomën e Filipit. Ajo e merrte më vete kudo që shkonte kufomën e tij, dhe u nda prej saj vetëm kur trupi i pajetë u balsamos, dhe ajo vetë u mbyll përjetë në një manastir afër Burgosit në vitin 1509.
Perandori romak Kaligula e trajtonte kalin e tij si një njeri, madje thuhet se e shpalli konsull
Gaius Julius Çezar Germanikus, ose shkurt Kaligula, ishte një anëtar i dinastisë Julio-Klaudiane dhe perandor i Romës në vitet 37-41 para Erës Sonë. Gjatë mbretërimit të tij të shkurtër, ai u bë i famshëm për disa sjellje të pazakonta, përfshirë marrëdhëniet e tij incestuoze me motrat. Por dashuria ndaj motrave nuk ishte asgjë në krahasim me dashurinë që ai kishte ndaj kalit të tij, Insitatus.
Sipas disa burimeve historike, Kaligula ndërtoi për kalin një stallë të posaçme prej mermeri, një shtëpi, dhe madje do ta ftonte kafshën për darkë, ku kali do të ushqehej me tërshërë. Madje pretendohet se Kaligula e bëri kalin e tij konsull, edhe pse kjo është ende sot diçka e diskutueshme midis historianëve.
Cari i Rusisë Ivani i Tmerrshëm, argëtohej kur torturonte dhe vriste njerëzit
Ivani IV u kurorëzua Cari i Rusisë në vitin 1547. Ai ishte një sundimtar shumë paranojak, dhe kishte fiksim gjymtimin dhe torturimin e njerëzve. Dhe magjepsja e tij pas dhunës nisi që në moshë të re. Kur ishte fëmijë, Ivani e kalonte kohën e tij të lirë duke torturuar kafshë të vogla. Ai kapte zogj dhe u gjymtonte trupat për argëtim, përfshirë shkuljen e pendëve, nxjerrjen e syve me thikë, apo prerjen e trupave të tyre. Ai gjente mace dhe qen endacakë, të cilët i çonte në vende të larta, dhe prej andej i hidhte duke i vrarë.
Cari i Rusisë, Pjetri III e kalonte kohën e lirë duke luajtur me kukulla
Cari Pjetri III lindi në Gjermani. Por kur prindërit i vdiqën, kujdestarinë e tij e mori tezja e tij Elizabeta, perandoresha e Rusisë. Pjetri sundoi për pak kohë në mesin e shekullit XVIII-të, përpara se gruaja e tij, Katerina e Madhe, ta detyronte të largohej nga pushteti, dhe ta vriste pak kohë më vonë.
Por edhe para tij momenti, Carit nuk dukej se i interesonte të ishte mbret pasi ai vdiste të luante me lodrat e tij. Sipas raporteve që përfshijnë edhe kujtimet e Katerinës, ai kalonte orë të tëra duke luajtur me ushtarët e tij lodra, në vend se të kalonte momente intime me gruan e tij.
Perandori kinez Qin Shihuang, ishte i vendosur të zbulonte ilaçin që garanton pavdekësinë
Qin Shihuang themeloi dinastinë Qin, dhe konsiderohet si perandori i parë i Kinës. Ai kishte gjithçka që mund të dëshironte një i vdekshëm. Por e shpërdoroi pjesën më të madhe të kohës dhe paratë, në përpjekje për të gjetur çelësin e jetës së përhershme. Qin Shihuang besonte tek një legjendë e lashtë, sipas së cilës në mesin e detit ekzistonin tre “male shpirtërore”, ku jetonin të pavdekshmit.
Ai dërgoi shumë ekspedita detare për të gjetur barishtet magjike që garantojnë pavdekësinë. Perandori konsumonte shpesh eliksirë dhe ilaçe, të cilat ai mendonte se do t’ia zgjasnin jetën. Por ato ilaçe, të krijuara nga alkimistët, përmbanin shpesh merkur, dhe ky lëng tepër helmues ka shumë të ngjarë të ketë qenë edhe shkaku kryesor i vdekjes së tij.
Napoleoni pëlqente të përtypte jamball
Shumica e njerëzve e njohin Napoleon Bonapartin, perandorin dhe udhëheqësin ushtarak francez që pushtoi shumicën e Evropës në fillim të viteve 1800. Për të ka shumë fakte dhe mite të njohura. Njëra prej të cilave është varësia e tij nga bima mjekësore e jamballit.
Napoleoni e merrte me vete kudo që shkonte dhe thuhet se hante çdo ditë një sasi të caktuar. Ai e përdorte atë për kënaqësi, por edhe si ilaç për shumë sëmundje. Napoleoni hëngri aq shumë jamball sa dhëmbët iu nxinë që të gjitha.
Mbreti i Vllahisë Vladi III, i ngulte në hunj të mprehtë trupat e armiqve të tij
Vladi III ishte sundimtari i Vllahisë në Rumaninë e sotme në shekullin XV, dhe njihej si Vlad Hungulësi. Arsyeja? I pëlqente të ngulte trupat e armiqve mbi hunj me maja të mprehta, dhe t’i linte ashtu për ditë më radhë.
Pas një fitoreje të madhe ndaj osmanëve, Vladi vendosi në këtë mënyrë rreth 20.000 ushtarë turq, duke i lënë ata të kalbeshin në periferinë e qytetit të Tërgovishtes, që t’i shihte ushtria osmane. Pasi pa atë skenë të tmerrshme, sulltani urdhëroi tërheqjen e menjëhershme nga Vllahia. Historia e Drakulës, mendohet se bazohet pikërisht tek ajo e Vladit III.
Burimi i lajmit: https://www.ranker.com/list/bizarre-obsessions-of-royals-in-history/chase-christy?ref=browse_list
Përshtatur nga TIRANA TODAY
