Një aksident fatal ndodhur 5 vite më parë, krijoi domosdoshmërinë e vendosjes së kangjellave në rrugët e Tiranës. Në korrik të vitit 2016, u mor zvarrë nga një makinë në kryqëzimin e rrugës “Jordan Misja” me Unazën pranë Arshivit të shtetit, Dhurata Prifti, 37 vjeçe. Bashkë me dy fëmijët e saj, ajo po kalonte rrugën kur një automjet “Benz” me shpejtësi i përplasi të tre.
Kreu i Bashkisë së Tiranës ka risjellë në kujtesë këtë problematikë, duke iu referuar disa vendimeve nga gjykatat, që kanë urdhëruar Bashkinë të heqë kangjellat e vendosura në rrugët e Tiranës, për të parandaluar aksidentet.
Veliaj tha se këto kangjella kanë shpëtuar jetë. Kryebashkiaku Veliaj akuzon gjyqtarët se favorizojnë pronarët e lokaleve dhe lavazheve. Ai ka përmendur disa vendime të gjykatave, për të hequr rrethimet mbrojtëse anash rrugëve të Tiranës.
“Kam parë këtë javë disa vendime skandaloze gjykatash, të cilat urdhërojnë Bashkinë e Tiranës të heqë kangjellat mbrojtëse anash rrugëve. Flas për rrugën e Kombinatit dhe rrugën “Dritan Hoxha”. Ato kangjella e kanë çuar në zero nivelin e aksidenteve të fëmijëve apo të të moshuarve.
Sigurisht, edhe në Londër, edhe në Paris, kam parë kangjella mbrojtëse në rrugët kryesore, për të orientuar qytetarët që të kalojnë vetëm në semafor. Këto janë vendime gjykatash që i lobon një gomisteri, që i lobon një lavazh apo një lokal. Ndaj, kur më keni parë që e përshëndes Reformën në Drejtësi, bëhet fjalë edhe për raste të tilla, krejtësisht banale, kur Bashkia e Tiranës merr një masë administrative, kurse gomisteria, lavazhi apo lokali paguajnë gjykatësin të urdhërojë Bashkinë e Tiranës të heqë kangjellat që mbrojnë jetë. Kjo nuk funksionon”, deklaroi Veliaj.
