Për fat të keq është zgjeruar harta e gripit të shpendëve. Zv. Ministrja e Bujqësisë, Ermira Gjeci, ka bërë të ditur se në Vlorë është konfirmuar një rast i ri i gripit të shpendëve.
“Në 24 orët e fundit kemi një rast të ri të konfirmuar, kemi një rast të ri në qarkun Vlorë. Vazhdojmë fushatën sensibilizuese”, tha Gjeci.
Zv/Ministrja e Bujqësisë, Ermira Gjeci, në një konferencë për mediat u shpreh se Bashkitë do marrin masa për të ndaluar tregtimin e shpendëve të gjalla në mjedise të hapura, të pa miratura.
“Kemi marrë zotim nga Bashkitë për bashkëpunim për marrjen e masave për ndalimin e tregtimit të shpendëve të gjalla në mjedise të hapura të pa miratuara për shitje”, tha zv ministrja.
“Jemi në monitorim të territorit dhe vazhdojmë fushatën sensibilizuese. Ushqimet në tregun tonë janë të kontrolluara, nuk ka rrezik nga konsumi i mishit dhe vezëve të gatuara mbi 70 gradë”, theksoi ajo.
