Kryeministri i ri Grek, Kyriakos Mitsotakis zhvilloi ditën e enjte një takim me kancelaren gjermane, Angela Merkel. Gjatë vizitës në Berlin, ai theksoi se shpreson që Gjermania do të pranojë të fillojë negociatat për dëmshpërblimet e luftës. “Shpresojmë se do të ketë një përgjigje pozitive”, deklaroi Mitsotakis.
Në muajin prill, qeveria e mëparshme greke dorëzoi një kërkesë zyrtare për të filluar bisedimet për pagimin e dëmshpërblimeve. Ndërkohë, Athina pretendon se Greqia është dëmtuar gjatë dy luftërave botërore.
Athina vlerëson se mund të kërkojë dëmshpërblime minimale prej 292 miliardë eurosh (323 miliardë dollarë) për pushtimin gjatë Luftës së Dytë Botërore nga ana e Gjermanisë dhe 9.2 miliardë euro (10,19 miliardë dollarë) për Luftën e Parë Botërore.
Sa i përket kësaj çështjeje, Merkel nuk e përmendi gjatë konferencës për shtyp. Kohë më parë, Gjermania ka thënë se çështja e dëmshpërblimeve të Luftës së Dytë Botërore në Greqi ishte zgjidhur.
