Zv.ministri grek i Mbrojtjes Civile, Nikos Hardalias bën me dije se Greqia nuk do ta hapë kufirin tokësor me Shqipërinë, më datë 1 korrik siç parashikohej.
Gjatë një vizite në Janinë, Hardalias sqaroi për gazetarët se kufiri me Shqipërinë nuk do të hapet për arsye sigurie që lidhen me pandeminë e koronavirusit. Ai theksoi se Greqia nuk do të tolerojë në çështje të shëndetit publik.
“Ne jemi duke punuar shumë për t’i mbajtur protokollet në të gjitha pikat hyrëse, në mënyrë që të kontrollojmë dhe të kemi siguri. Në çështjet e shëndetit publik, nuk ka asnjë vullnet për tolerim”, tha ai.
Sa i përket pikës së Kakavijës në kufirin me Shqipërinë, Hardalias tha se nuk do të hapet në mënyrë të menjëhershme dhe nëse kjo do të bëhet do të kryhet në disa nivele.
